ԵՐԵՎԱՆ, 27 մայիսի – Sputnik. Ի՞նչ է լինելու արցախյան խնդրի լուծման հետ, եթե 4 տարի անց ռուսական խաղաղապահ զորակազմը դուրս բերվի Արցախից։ Հայաստանի հանրային հեռուստաընկերության եթերում նման հռետորական հարց հնչեցրեց ՀՀ առաջին նախագահ Լևոն Տեր-Պետրոսյանը` նշելով, որ քաղաքական տարբեր ուժեր խոսում են խնդրի լուծման ոչ իրատեսական սցենարների մասին։ Նրա կարծիքով՝ դա նրանց անհեռատեսության մասին է խոսում։
«Պարզ ասում եմ՝ ես չգիտեմ։ Իմանալու համար ի՞նչ է պետք ինձ` ես պետք է իմանամ ռուսների ծրագիրը։ Ի՞նչ է ուզում Ալիևը, Ադրբեջանը` մենք գիտենք։ Բայց ես չգիտեմ Ռուսաստանի ծրագիրը։ Ռուսաստանն իր ծրագիրը ոչ մեկին չի էլ բացահայտում»,- նշեց Լևոն Տեր-Պետրոսյանը։
Նրա խոսքով՝ Ռուսաստանը Հայաստանում այսօր ունի միայն մեկ զրուցակից՝ երկրի ղեկավարը։ Ասում է՝ ինքն էլ կապեր ունի Ռուսաստանի հետ, դեսպանի հետ է երբեմն հանդիպում, ՀՀ երկրորդ նախագահ Ռոբերտ Քոչարյանն ավելի շատ կապեր ունի Մոսկվայում։
Ընդգծում է, որ նախկինում երբեք այսքան կոպիտ երկխոսություն չի եղել Հայաստանի ու Ադրբեջանի ղեկավարների միջև՝ ո՛չ իր, ո՛չ Ռոբերտ Քոչարյանի, ո՛չ Սերժ Սարգսյանի օրոք։
«Սա նիկոլիզմի արտահայտություն էր»,–ասաց նա։
Լևոն Տեր-Պետրոսյանի խոսքով՝ Փաշինյանն ուրիշ խնդիր ունի։
«Ես վստահ եմ՝ Ռուսաստանն ամենայն անկեղծությամբ ասում է այն, ինչ մտադիր է անել այս տարածաշրջանում, Հայաստանի, Ղարաբաղի ապագայի վերաբերյալ։ Փաշինյանն անգամ չի ասում՝ ռուսներն իրեն ինչ են ասում»,–ասաց ՀՀ առաջին նախագահը։
Ինչպես մեզ համար անբարենպաստ բանաձևը հայտնվեց Քլինթոնի սեղանին․ պատմում է Տեր-Պետրոսյանը
Նա դժվարանում է ասել, թե ինչ կլինի Հայաստանի և Արցախի հետ, եթե ռուսները հեռանան. հնարավոր սցենարների թվում նոր պատերազմն է։ Բայց կարևոր է իմանալ նաև Թուրքիայի տրամադրությունների մասին։
Առաջին նախագահն, այնուամենայնիվ, կարծում է, որ Մոսկվան լուրջ ծրագրեր ունի Անդրկովկասի վերաբերյալ, և դրա անուղղակի հաստատումը Ռուսաստանի մուտքն է Սիրիա:
Լևոն Տեր-Պետրոսյանն ասաց` ինչ ճանապարհ էր առաջարկում Արցախի խնդիրը լուծելու համար
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
