ԵՐԵՎԱՆ, 27 մայիսի – Sputnik. Անցյալից ամենակարևոր դասը, որ պետք է քաղենք, իրատեսությունն է։ Հանրային հեռուստաընկերության եթերում այս մասին ասաց ՀՀ առաջին նախագահ Լևոն Տեր-Պետրոսյանը։
«Պատրանքները պետք է թոթափել՝ ծովից ծով Հայաստան, Քուռ-արաքսյան հանրապետություն և այլն։ Մեծ շնորհք չի պահանջվում, մեծ ուղեղ էլ պետք չէ՝ եթե մարդ գալիս է իշխանության, պետք է նախ իմանա՝ ինչ վիճակում է Հայաստանը, ինչ արտաքին, քաղաքական մարտահրավերներ ունի և փորձի ամենաիրատեսական մեթոդներով փորձել այդ խնդիրները լուծել»,–ասաց նա։
ՀՀ առաջին նախագահի խոսքով՝ «պատրանքները տհաս հասարակություններին է հատուկ»։ Ոչ մի հասուն հասարակության մեջ չի կարող նման բան լինել։
«Հսկայական ինստիտուտներ են աշխատում այդ լուրջ, մեծ պետությունների շուրջ՝ և' անալիտիկներ, և' հետախուզական ծառայություններ, ամեն դետալին ուշադրություն են դարձնում՝ իրենց քաղաքական քայլերի վնասներն ու օգուտները»,–ասաց նա։
Տեր–Պետրոսյանի կարծիքով` Հայաստանի իշխանություններն իրենց քայլերով գրգռում էին Ադրբեջանին։ Օրինակ, երբ ամեն օր հեռուստատեսությամբ ցուցադրում էին Հայաստան-Արցախ միացյալ քարտեզը։
Ինչպես մեզ համար անբարենպաստ բանաձևը հայտնվեց Քլինթոնի սեղանին․ պատմում է Տեր-Պետրոսյանը
Նրա խոսքով՝ «սա սադիզմ էր Հայաստանի իշխանությունների կողմից»։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
