ԵՐԵՎԱՆ, 27 մայիսի – Sputnik․ Հայաստանի տարածքում ադրբեջանցի զինվորականների թիվն ընդհանուր առմամբ չի գերազանցում 1000-ը։ Այսօր կայացած ասուլիսի ժամանակ հայտարարեց ՀՀ ԶՈւ գլխավոր շտաբի պետի տեղակալ, գեներալ-մայոր Էդվարդ Ասրյանը՝ պատասխանելով Sputnik Արմենիայի հարցին։
Նա վստահեցրեց, որ հակառակորդը որևէ լուրջ մարտական խնդիր կատարելու հնարավորություն չունի։
«Եթե մենք որոշենք ուժի դիմել, ապա հակառակորդը ոչ մի հնարավորություն չի ունենա», - ասաց Ասրյանը:
ՀՀ ԶՈւ գլխավոր շտաբի պետի տեղակալը վստահեցրեց, որ մեր երկրի քաղաքական ղեկավարությունը չկրակելու հրաման չի տվել. նման հրաման տալ չի կարող, դա զինվորականների գործն է:
«Եթե մենք զգանք, որ հակառակորդը ձգտում է ինչ-որ վերադասավորումների, պատրաստվում է մարտի, ապա մենք ինքներս կսկսենք կրակել, կկիրառենք զենք և կոչնչացնենք նրան: Հակառակորդի բոլոր զինվորները մեր անմիջական նշանառության տակ են։ Իմ գնահատմամբ՝ ուժի կիրառման անհրաժեշտություն առայժմ չկա»,-ավելացրեց գեներալ-մայորը։
Ասրյանի խոսքով` եթե հակառակորդը փորձի վերադառնալ որոշակի հեռավորության վրա, ապա այդ քայլը կարող է գնահատվել որպես մարտական բախումների սպառնալիք: Սակայն առայժմ նրանք գտնվում են մոտ հեռավորության վրա՝ 30, 50, 60 մետր։ Դա, ըստ ՀՀ ԶՈւ գլխավոր շտաբի պետի տեղակալի, նշանակում է, որ նրանք չեն պատրաստվում կրակել։
Նշենք, որ ՀՀ ՊՆ տարածած հաղորդագրության համաձայն` այսօր առավոտյան ՀՀ Գեղարքունիքի մարզի սահմանային հատվածում, ՀՀ ԶՈւ N զորամասի պահպանության տարածքում ինժեներական աշխատանքներ կատարելիս ադրբեջանական զինված ուժերի զինծառայողների կողմից շրջափակվել և գերեվարվել են ՀՀ ԶՈւ վեց զինծառայողներ։
Հայտնի են գերի ընկած զինվորականների անունները
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
