Մայիսի 25-ին Գեղարքունիքի մարզի Ճամբարակ խոշորացված համայնքի Վահան բնակավայրում տեղացած կարկուտի հետևանքով գրեթե ամբողջությամբ հողին են հավասարվել աշնանացան ցորենը, գարին, սխտորն ու բազմամյա խոտաբույսերը։ Sputnik Արմենիայի հետ զրույցում տեղեկությունը հայտնեց համայնքապետարանի աշխատակազմի ղեկավար Արտակ Ստեփանյանը։
«Որոշ տեղերում կարկուտի հաստությունը հասել է մինչև 20 սմ-ի։ Հիմնական վնասը կրել է Վահան բնակավայրը`մոտավորապես 80 հա-ի չափով։ Բնակավայրում հիմնականում անասնապահությամբ են զբաղվում։ Բազմամյա խոտաբույսերն այս տարի ավելի շատ էին ցանել, քան նախորդ տարիներին, ու հիմնական վնասը հենց անասնապահներն են կրել»,- ասաց նա։
Նրա խոսքով` աշնանացանի վնասված ցանքատարածություններն հիմա արդեն վերականգնել չի լինի։
«Բազմամյա խոտաբույսերի առաջին բերքից գրեթե ոչինչ չի մնացել, բայց հնարավոր է, որ երկրորդ աճ տա։ Տարեկան երկու անգամ են հնձում այդ խոտաբույսերը, եթե ֆորս–մաժորներ չլինեն, կարող են երկրորդ բերք ստանալ»,- նշեց Ստեփանյանը։
Կարկտահարությունից հետո համայնքապետարանի մասնագետներն այցելել են գյուղացիական տնտեսություններ, վնասի գնահատման աշխատանքներ իրականացրել։ Վաղը նրանց կմիանան մարզպետարանի գործընկերները, որ ամփոփեն գյուղատնտեսների կրած վնասի չափը։
Քամին ավերածություններ է պատճառել Ակունք գյուղում
«Վնասի չափը թվերի տեսքով կիմանանք, երբ վերջնական մասնագիտական եզրակացությունը պատրաստ լինի։ Այնուհետև կփորձենք փոխհատուցման ներկայացնել»,- նշեց նա։
Վնասի մասնակի փոխհատուցում ստանալուց բացի, համայնքապետարանի աշխատակիցներն այս անգամ կփորձեն նաև հակակարկտային կայանքների կառուցման հարցը հաջորդ տարվա սուբվենցիոն ծրագրերում ներառել։
