ԵՐԵՎԱՆ, 22 մայիսի - Sputnik. Համացանցում հրապարակված փաստաթղթով, որի իսկությունն արդեն հաստատել է նաև ՀՀ վարչապետի պաշտոնակատար Նիկոլ Փաշինյանը, Ադրբեջանը փորձում է ամբողջովին շրջափակման մեջ վերցնել Հայաստանը։ Այս մասին այսօր Հայաստանի ինքնապաշտպանության կոմիտեի հրավիրած հանրահավաքում հայտարարեց ռազմական փորձագետ Հայկ Նահապետյանը։
«Կտրել են Գորիսից Կապան ճանապարհը։ Ցանկացած պահի կարող են փակել։ Փորձում են երկրորդ ճանապարհ բացել դեպի Նախիջևան` Բերձոր–Գորիս–Սիսիան–Նախիջևան»,– ասաց Նահապետյանը։
Նրա խոսքով` վերջին օրերի սահմանային դեպքերը հենց այս համատեքստում են մեկնաբանվում, երբ Ադրբեջանը վերահսկողության տակ է առնում այդ ծրագրի իրագործման համար կարևոր ռազմավարական բարձունքները։
Իսկ եթե իրականությանը համապատասխանում են նաև Տավուշի 5 գյուղերի հանձնման մասին հնարավոր պայմանավորվածության մասին լուրերը, ապա, ըստ Նահապետյանի, Ադրբեջանն այդկերպ կտրում է Հայաստանից Վրաստան գնացող միջպետական ճանապարհը։
«Եթե վերադարձվի Արարատի մարզի Տիգրանաշեն գյուղը, ապա Հայաստանն ուղղակիորեն բաժանվում է 2 մասի։ Սա պայմանագիր է, որով մեր լինելությունն ամբողջովին վտանգվում է։ Եվ մենք ամբողջովին տրվելու ենք Թուրքիայի ազդեցությանը»,–ասաց Նահապետյանը։
Հիշեցնենք, որ ՀՀ երրորդ նախագահ Սերժ Սարգսյանի փեսան` Վատիկանում ՀՀ նախկին դեսպան Միքայել Մինասյանը, մայիսի 19–ին Facebook–ում գրել էր, որ ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
Նրա խոսքով` այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ մայիսի 20–ին կառավարության նիստում ՀՀ վարչապետի պաշտոնակատար Նիկոլ Փաշինյանը ոչ միայն չժխտեց, որ նման փաստաթուղթ գոյություն ունի, այլև հայտարարեց, որ պատրաստվում է ստորագրել այն։
Փաշինյանը վստահեցրեց, սակայն, որ չկա և չի կարող լինել ոչ մի գաղտնի հավելված։ Նա նշեց` փաստաթղթի վերևի հատվածում գրված է «Հավելված», քանի որ դա կամ վրիպակ է` պետք է գրված լիներ «Նախագիծ», կամ էլ դա առաջարկ է` այն դիտարկել որպես նոյեմբերի 9-ի հայտարարության հավելված։
