ԵՐԵՎԱՆ, 20 մայիսի – Sputnik. Գեղարքունիքի մարզի Կութ համայնքում կրակոցներ են հնչել տեղի դիրքի ուղղությամբ: Sputnik Արմենիային հայտնեցին ՀՀ պաշտպանության նախարարությունից։
«Քիչ հետո հաղորդագրություն կտարածենք»,–ասացին գերատեսչությունում։
Կութի ղեկավար Սիմա Չիտչյանն էլ Sputnik Արմենիային հայտնեց, որ կրակոցները գյուղում չեն լսվել։
«Ես հիմա գյուղապետարանում նստած եմ, որևէ կրակոցի ձայն չեմ լսել։ Հավանաբար դիրքերի ուղղությամբ է եղել, իսկ դրանք գյուղից հեռու են։ Տեղ կա` 9, տեղ կա` 11 կիլոմետր»,–ասաց նա։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։
