ԵՐԵՎԱՆ, 20 մայիսի -Sputnik. Եթե ՀԱՊԿ–ում սկսեն կրակել, դա կվերածվի տարածաշրջանային մեծ պատերազմի։ Այս մասին այսօր կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը` մեկնաբանելով, որ ՀԱՊԿ–ը ոչ թե կրակելու, այլ ճգնաժամային իրավիճակներում էսկալացիա թույլ չտալու կազմակերպություն է։
«Այս առումով շատ կարևոր է հասկանալ, թե որն էր ադրբեջանական կողմի գործողությունների նպատակը։ Տարբերակներից մեկը պատերազմի հրահրումն էր», – ասաց Փաշինյանը` հիշեցնելով, որ Սյունիքում Ադրբեջանն առաջ է եկել ՀՀ տարածքի ամենանեղ հատվածում, և, եթե իրադրությունը դուրս գար վերահսկողությունից, այնտեղ կարող էին անկառավարելի իրադարձություններ զարգանալ, որը հետո շատ մեծ խնդրի առաջ կկանգնեցներ Հայաստանը։
«Այնպես որ, մեր մոտեցումը` հարցը լուծել միջազգային անվտանգային մեխանիզմներով, համարում եմ ճիշտ, և այն, այս պահի դրությամբ, արդարացնում է իրեն։ Բայց քանի դեռ այդ փաստը տեղի չի ունեցել, մենք չենք կարող ասել, որ հասել ենք այդ ճանապարհով մեծ նպատակին»,– ասաց նա։
Փաշինյանը չբացառեց նաև, որ Ադրբեջանն այս կերպ փորձում է ազդել նաև ՀՀ ներքաղաքական պրոցեսների, ընտրությունների արդյունքների վրա և « Հայաստանում գործող գործակալական ցանցին քաղաքական աջակցություն ցուցաբերել»։
Նշենք, որ այսօրվա կառավարության նիստում ՀՀ վարչապետի պաշտոնակատար Նիկոլ Փաշինյանն ասել էր, որ Ադրբեջանի Հանրապետությունը ՀՀ քաղաքական վերնախավում ունի տեղեկատվական պայքարի գործակալներ։
Հիշեցնենք` մայիսի 12-ի առավոտյան ադրբեջանական զինուժը «սահմանների ճշգրտման» հիմնավորմամբ փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն անվտանգության խորհրդի նիստում հայտարարեց, որ սա Ադրբեջանի կողմից դիվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
Մայիսի 14–ին Փաշինյանը հայտարարեց, որ կեսօրին պաշտոնապես դիմել են ՀԱՊԿ և ռազմական աջակցության հարցով դիմել ՌԴ նախագահ Վլադիմիր Պուտինին։
Մայիսի 13-ից ադրբեջանցիների հետ բանակցություններ են անցկացվում։ Այսօր` մայիսի 19–ին, ադրբեջանական կողմը չէր ներկայացել բանակցություններին։
