ԵՐԵՎԱՆ, 12 ապրիլի – Sputnik. Դատախազությունը ՀՀ երրորդ նախագահ Սերժ Սարգսյանի կողմից ենթադրյալ գաղտնի տեղեկություններ հրապարակելու վերաբերյալ դիմում է ուղարկել ռազմական ոստիկանություն։ Տեղեկությունը Sputnik Արմենիայի հետ զրույցում հայտնեց դատախազության հանրային կապերի բաժնի պետ Արևիկ Խաչատրյանը։
Նա նշեց` դիմում է ուղարկվել սահմանված կարգով նյութեր նախապատրաստելու և ընթացքը լուծելու համար:
Հիշեցնենք` Սերժ Սարգսյանը փետրվարի 16-ին «Արմնյուզին» տված հարցազրույցում հայտնել էր, որ 2016թ.-ի ապրիլյան պատերազմից հետո իշխանությունը հետաքննություն է անցկացրել, ուսումնասիրել հակառակորդի կիրառած միջոցներն ու պլանավորել 1 մլրդ 300 մլն դոլարի սպառազինություն ձեռք բերել 2018-24թթ-ին պետական բյուջեի ու վարկային միջոցների հաշվին: Նա նշել էր` ծրագրում էին մինչև 2024 թվականը 2500 ԱԹՍ ձեռք բերել (2018-2020 թվականներին` 1000 ԱԹՍ)։
Սարգսյանի խոսքով` այդ գործարքներն այդպես էլ չիրականացվեցին, քանի որ ՀՀ նոր իշխանությունը փոխեց այդ պլանը:
«Արցախյան պատերազմի մասին հարցազրույցի հետքերով». ինչում էր ճիշտ ու սխալ Սերժ Սարգսյանը
