ԵՐԵՎԱՆ, 6 ապրիլի - Sputnik. ՊԵԿ նախագահ Էդվարդ Հովհաննիսյանն այսօր ԱԺ–ում լրագրողների հետ ճեպազրույցում հայտարարել է, որ իր ընտանիքը երբեք քաղաքականության չի զբաղվել ու չի զբաղվում։
«Իմ հայրը համայնքի ղեկավար է 2008թ–ից։ Ընդ որում, համայքի ղեկավար է որպես անկուսակցական, և որպես անկուսակցական է մասնակցել ընտրություններին։ Եվ որևէ քարոզարշավի կամ մարզային այցերի (համայնքի շրջանակներից դուրս, համենայնդեպս) երբեք չի ներգրավվել»,– ասաց Հովհաննիսյանը` մեկնաբանելով մամուլում տարածված լուրերն այն մասին, որ մարտի 28-ին վարչապետ Նիկոլ Փաշինյանի` Արմավիրի մարզ կատարած այցի ընթացքում քաղաքացիների մեծ թվով ներկայությունն ապահովել է հատկապես Ալաշկերտի գյուղապետ Կարեն Հովհաննիսյանը` ՊԵԿ նախագահի հայրը։
«Բնակիչներին որևէ մեկը հանդիպման վայր չի ուղղորդել։ Բնակիչներն իմացել են, որ երկրի վարչապետը գալու է իրենց համայնք և մեծ ուրախությամբ ներկա են գտնվել»,– ասաց Հովհաննիսյանը։
«Ձեզ վախացնելո՞վ են բերել»․ Փաշինյանի մարզային հանդիպմանը կրկին երեխաներ են եղել
Հիշեցնենք` վարչապետի մարզային այցից հետո մամուլը գրեց, որ Ալաշկերտ համայնքում Փաշինյանին դիմավորողների թվաքանակը պայմանավորված էր գյուղապետի հանգամանքով։
Սա այն համայնքն է, որտեղ Փաշինյանին երեխաները դիմավորել էին աղուհացով։
