ԵՐԵՎԱՆ, 6 ապրիլի - Sputnik. Ռազմարդյունաբերության կոմիտեում առարկայական փոփոխություններ պետք է իրականացվեն։ Այդ մասին հայտնել է ՀՀ բարձր տեխնոլոգիական արդյունաբերության նորանշանակ նախարար Հայկ Չոբանյանը, որն այցելել է ռազմարդյունաբերության կոմիտե։ Տեղեկությունը հայտնում են ԲՏԱ-ի ֆեյսբուքյան էջից։
Նախարարը հանդիպել է ռազմարդյունաբերության կոմիտեի աշխատակազմի հետ: Նրան են ներկայացվել կոմիտեի կառուցվածքը, ընթացիկ աշխատանքները:
«Մեր աշխատանքը կառուցվելու է գործնական հիմքի և չափելի արդյունքի վրա», - նշել է Չոբանյանը
Նա նաև հավելել էր, որ Ռազմարդյունաբերության կոմիտեն բացառիկ նշանակություն ունի։
Հիշեցնենք, որ ապրիլի 1-ին կառավարության նիստի ժամանակ վարչապետ Նիկոլ Փաշինյանը հայտնեց` Տավուշի մարզպետ Հայկ Չոբանյանն ազատվում է պաշտոնից և փոխարինում ՀՀ բարձր տեխնոլոգիական արդյունաբերության նախարար Հակոբ Արշակյանին:
Արշակյանը մարտի 31-ին էր հայտնել, որ ազատվում է աշխատանքից։
