ԵՐԵՎԱՆ, 2 ապրիլի – Sputnik․ ՀՀ փոխվարչապետ Տիգրան Ավինյանն այսօր Արցախի հերոս, գեներալ-մայոր Արկադի Տեր-Թադևոսյանի հոգեհանգստի ժամանակ ասաց, որ Կոմանդոսը պետք է օրինակ լինի մեր զինված ուժերի, զինծառայողների համար։
«Սա մեծ կորուստ է մեզ համար․․․ Իր կերպարը, կարծում եմ, պատմության մեջ մնալու է դարերով»,- նշեց Ավինյանը։
Նա անդրադարձավ նաև այն հարցին, թե ինչպես է կառավարությունը փորձելու զարգացնել ու ամրապնդել այն բանակը, որի ստեղծման ակունքներում կանգնած է եղել հենց լեգենդար հրամանատարը։
Հայկական արտադրության նռնականետի արկերը սերիական արտադրության փուլում են. տեսանյութ
«Հիմա զինված ուժերի բարեփոխումների լայն հայեցակարգ է մշակվել, ՊՆ նախարարը գլխավորում է բարեփոխումների այդ աշխատանքային խումբը, մենք իրապես և խորքային պետք է վերանայենք մեր մոտեցումները ԶՈւ կազմակերպման առումով և բոլոր առումներով՝ և՛ առաջին գծի մասին է խոսքը, և՛ տեխնիկայի, և՛ թիկունքի։ Կարծում եմ՝ փաստահավաք խումբը, որը պետք է գործի ԶՈւ բարեփոխումների հայեցակարգի և այդ խմբի ներքո, պետք է տա շատ հարցերի պատասխաններ՝ միտված ԶՈւ զարգացմանը»,- նշեց փոխվարչապետը։
Նա ընդգծեց, որ մեծ ուշադրություն է դարձվելու ռազմարդյունաբերությանը, քանի որ նաև պատերազմի փորձը մեզ ցույց տվեց, որ որոշ դեպքերում և՛ օդում, և՛ ցամաքում կարող ենք հայտնվել բլոկադայի պայմաններում։ Ավինյանի խոսքով՝ կարևոր է, որ աշխատանքների մեծ ծավալ կարողանանք իրականացնել ՀՀ տարածքում։ Նա շեշտեց, որ ռազմարդյունաբերության ոլորտը ԶՈւ բարեփոխումների շրջանակում շատ կարևոր տեղ է զբաղեցնում։
