ԵՐԵՎԱՆ, 30 մարտի - Sputnik. Իշխանությունները չեն հասկանում, որ ապաշրջափակման անվան տակ խորը շրջափակում է լինելու ՀՀ–ի և Արցախի։ Լրագրողների հետ զրույցում նման կարծիք հայտնեց ՀՀ պաշտպանության նախկին նախարար Սեյրան Օհանյանը` անդրադառնալով Անվտանգության խորհրդի քարտուղար Արմեն Գրիգորյանի հայտարարությանը։
Այս տարի ապրիլի 24-ը կունենա հավելյալ խորհուրդ. ԱԳ նախարար
Նշենք, որ մեծ աղմուկ է բարձրացրել Գրիգորյանի` Հանրային հեռուստաընկերությանը տված հարցազրույցի ժամանակ արված այն հայտարարությունը, որ պետք է շտկումներ մտցնել Թուրքիայի նկատմամբ Երևանի մոտեցումներում։
«Իրենց թվում է` թուրքերին շողոքորթելով թուրքերն ընդառա՞ջ են գնալու Հայաստանին։ Թուրքերն իրենց նպատակն ունեն` «Մեծ Թուրանի» գաղափարն իրագործել»,–ասաց Օհանյանը։
Նա հավելեց, որ Անվտանգության խորհրդի քարտուղարն ավելի լավ է` իր պարտականությունները կատարի երկրի անվտանգությունն ապահովելու ուղղությամբ։ Օհանյանը հիշեցրեց, որ ԱԽՔ–ի պարտականություններն են` անվտանգային համակարգի համապատասխան պայմաններ ստեղծել մինչև պատերազմն ու պատերազմի ժամանակ։
Բացի այդ, նրա խոսքով, ԱԽ–ն այն կառույցն է, որտեղ ռազմաքաղաքական իրավիճակի ճիշտ եզրակացություններ է կազմվում և ճիշտ որոշումներ ընդունվում` պատերազմը շարունակել կամ կանգնեցնել։
Հիշեցնենք, որ հեռուստահաղորդավար Պետրոս Ղազարյանի «Թուրքիան այլևս թշնամի պետություն չէ՞ Հայաստանի համար» հարցին ի պատասխան Գրիգորյանը նշել է.
«Եթե մենք գնում ենք ապաշրջափակման, ապա մեր մոտեցումներում որոշակի շտկումներ պետք է լինեն, ու մենք այդ ուղղությամբ աշխատում ենք»։
Երեկ ԱԳ նախարար Արա Այվազյանը հայտնել էր, որ Հայաստանի ԱԳՆ-ում տեղյակ չեն Թուրքիայի հետ ինչ-որ քննարկումների, խորհրդակցությունների մասին։ Նման խորհրդակցություններ, ըստ նրա, չկան։
ՀՀ–ն թշնամիներ չի փնտրում տարածաշրջանում. Այվազյանը` թուրքական սպառնալիքի մասին
