ԵՐԵՎԱՆ, 26 մարտի - Sputnik. Ֆրանսիայի Ներքին Ռեյն դեպարտամենտի ղեկավարը կոշտ քննադատություն և մեղադրանքներ է հնչեցրել Ստրասբուրգի քաղաքապետ Ժաննա Բարսեղյանի հասցեին այն բանի համար, որ նա թուրքական ծայրահեղական իսլամական կազմակերպությանը բյուջեից միջոցներ է հատկացրել մզկիթ կառուցելու համար։ Տեղեկությունը հայտնում է France Bleu պարբերականը։
Ավելի վաղ հայտնի էր դարձել, որ Ստրասբուրգում ուզում են կառուցել Եվրոպայի խոշորագույն մզկիթը: Քաղաքապետարանը տվել է իր համաձայնությունը, ավելին՝ քաղաքապետ Ժաննա Բարսեղյանը համաձայնել է քաղաքային բյուջեից դրա համար 2,5 մլն եվրո հատկացնել։
Իմանալով այդ մասին, Ֆրանսիայի ներքին գործերի նախարար Ժերալդ Դարմանենն ասել է, որ Ստրասբուրգի քաղաքապետարանը չպետք է նման որոշում կայացներ, իսկ մզկիթի նախագիծը Ֆրանսիայի տարածքում օտարերկրյա միջամտություն է անվանել։
Դարմանենը պարզաբանել է, որ թուրք-իսլամական «Միլլի Գյորյուշ» կազմակերպությունը, որը գումար կստանա շինարարության համար, իրավունք չունի ներկայացնելու իսլամը Ֆրանսիայում, քանի որ չի ստորագրել Ֆրանսիայի Հանրապետության արժեքների ճանաչման մասին խարտիան։
Նախարարը հատուկ ընդգծել է, որ Ֆրանսիայում օտարերկրյա միջամտության փորձերը ուժեղ են Ստրասբուրգում, հատկապես՝ Թուրքիայի կողմից:
Քրիստոնեական Հայաստանի իսլամական սիրտը․ ինչո՞վ է հայտնի Երևանի Կապույտ մզկիթը
Դրանից հետո Բարսեղյանը նամակով դիմել է Ֆրանսիայի նախագահ Էմանուել Մակրոնին՝ խնդրելով պաշտպանել իրեն նման մեղադրանքներից։ Նա գրել է, որ որոշումը կայացվել է՝ ելնելով հանրապետությունում կրոնների հավասարության սկզբունքից։
Նա ավելացրել է, որ մզկիթի շինարարությունը սկսվել է դեռեւս 2017 թվականին՝ իրեն նախորդող Ժան Լյուկ Մարկսի օրոք, իսկ հանրապետական իշխանությունը նրան երբեք որևէ հարց չի ուղղել մզկիթի կառուցման ու դրա օրինականության վերաբերյալ:
Այդ հայտարարությունները հերքել է ներքին Ռեյնի դեպարտամենտի (որտեղ գտնվում է Ստրասբուրգը) ղեկավար Ժոզիանա Շևալիեն։ Նա ընդգծել է, որ մի քանի անգամ դիմել է Ստրասբուրգի քաղաքային իշխանությանն ու անձամբ Բարսեղյանին։
Նախարարի խոսքերն օդում կախված չեն մնացել։ Ֆրանսիայի ՆԳՆ-ի հանձնարարությամբ պրեֆեկտուրան կդիմի վարչական դատարան՝ պարզելու, թե արդյո՞ք մզկիթի կառուցումը համապատասխանում է հանրապետության արժեքներին։
Պրեֆեկտուրան ուշադրություն է հրավիրել այն հանգամանքին, որ «Միլլի Գերյու» ասոցիացիան ծայրահեղական իսլամական ուղղություն է, որը մոտ է «Մահմեդական եղբայրներին»։ Վերջինս ուզում է ամրապնդել իր ազդեցությունը Ֆրանսիայի թուրքերի շրջանում:
Վանդալիզմը շարունակվում է. ադրբեջանցիները գնդակոծել են Շուշիի Ղազանչեցոց եկեղեցու գմբեթը
Կազմակերպությունը հրաժարվել է ստորագրել Մահմեդական կրոնի ֆրանսիական խորհրդի նոր խարտիան, որում հաստատվում է տղամարդկանց ու կանանց հավասարությունն ու չի թույլատրվում օգտագործել իսլամը քաղաքական նպատակներով: «Միլլի Գերյուշը» դեմ է նաև ընտանեկան բռնությունն արգելող միջազգային կոնվենցիաներին։
Նշենք, որ Ստրասբուրգում գործում է Թուրքիայի հսկայական հյուպատոսություն՝ մոտ 9 հազար քառակուսի մետր տարածքում, այն հինգ մասնաշենք ունի։ Ֆրանսահայ լրագրող Տիգրան Եկավյանը նշում է, որ այստեղ աշխատում են նաև Թուրքիայի արտաքին հետախուզության ստորաբաժանումները։
«Միլլի Գերյուշը» հիմնականում աշխատում է ֆրանսիական դպրոցներում սովորող թուրք ներգաղթյալների երեխաների հետ։ Նրանց մեջ քարոզվում են ազգայնականության գաղափարները, իսկ ընդունակ երիտասարդներին օգնում են սովորել և հավակնել պետական պաշտոններին և զարգացնել Թուրքիայի ազդեցությունը։ Այդ կազմակերպության կառավարման ներքո Ֆրանսիայում արդեն 74 մզկիթ է գործում։
Ավելացնենք նաև, որ Ժերալդ Դարմանենը, հնարավոր է, ունի նաև հայկական արմատներ (ինչպես կարող է նրա ազգանունից թվալ), բայց ինքը երբեք չի խոսել այդ մասին։ Հայրական կողմից նրա նախնիները Մալթայից են, իսկ մոր կողմից՝ Մագրիբից (նրա պապը ալժիրցի մուսուլման էր)։ Դրա հետ մեկտեղ Դարմանենը հետևողականորեն հանդես է գալիս Ֆրանսիայում քաղաքական իսլամի դեմ:
Վանդալիզմ. Փարիզում պղծել են Հայոց ցեղասպանության խորհրդանիշ Կոմիտասի հուշարձանը
