ԵՐԵՎԱՆ, 25 մարտի - Sputnik. ՀՀ ԱԽ քարտուղար Արմեն Գրիգորյանն այսօր կառավարության նիստի ավարտին լրագրողների հետ ճեպազրույցում վերահաստատեց իր հայտարարությունն այն մասին, որ պատերազմի չորրորդ օրը Անվտանգության խորհրդի նիստում ոչ ոք չի առաջարկել դադարեցնել պատերազմը:
«Իմ հայտարարությունը հիմնված է փաստաթղթերի և արձանագրությունների վրա: ԱԽ այդ նիստն ամբողջությամբ արձանագրված է և այն, ինչ ես ասել եմ, արձանագրված է և փաստացի կա, այստեղ երկրորդ կարծիք չի կարող լինել»,- ասաց Գրիգորյանը:
Ինչ վերաբերում է այս հայտարարությամբ սլաքները Օնիկ Գասպարյանի դեմ ուղղելու մասին մեկնաբանություններին, ԱԽ քարտուղարը հայտարարեց.
«Մենք որևիցե նպատակ չունենք սլաքները ուղղելու դեպի զինված ուժեր: ԶՈւ-ում նույնիսկ պատերազմի մասին զեկույց պետք է պատրաստեին՝ Օնիկ Գասպարյանի գլխավորությամբ, և եթե մենք ուզեինք սլաքներն ուղղել դեպի ԶՈւ, ապա այդ զեկույցը մենք կպատրաստեինք»:
Հարցին ի պատասխան, թե ով է մեղավոր պատերազմի նման ելքի համար, Արմեն Գրիգորյանը հորդորեց սպասել ԶՈւ զեկույցին, որը, նրա խոսքով, պատրաստ լինելուն պես կներկայացվի հանրությանը:
Հիշեցնենք՝ Արմեն Գրիգորյանը Սիվիլնեթի հետ հարցազրույցում ասել էր, որ պատերազմի չորրորդ օրը Գլխավոր շտաբի պետը հանդիպմանը Անվտանգության խորհրդի նիստում ներկայացրել է ռազմական իրավիճակը, և այդ օրը ոչ ոք չի առաջարկել դադարեցնել պատերազմը:
Կանխատեսելի Հայաստանը. ինչու ընդդիմությունը չի կարողանում հասնել Փաշինյանի հրաժարականին
ԳՇ պետ Օնիկ Գասպարյանը, նրա խոսքով, նիստում ներկայացրել է թշնամու կողմից F-16- ի օգտագործման, Ջրականում հայկական կողմի աննշան հաջողությունների մասին, նաև ասել է, որ առաջնագծում ռազմական իրավիճակը չի փոխվել և բանակը կշարունակի իրականացնել իրեն վերապահված խնդիրները:
Մեր պարտության ամենամեծ պատճառն այն էր, որ բանակը պատրաստ չէր․ Արայիկ Հարությունյան
