ԵՐԵՎԱՆ, 24 մարտի - Sputnik. Լրատվական կայքերում վիճակախաղերի գովազդներ կարող են տեղադրվել միայն օրվա որոշակի ժամերի: «Գովազդի մասին» ՀՀ օրենքում կառավարությունն առաջարկում է թույլատրելի ժամ սահմանել երեկոյան 22:00-ից մինչև 07:00-ն:
Նշենք, որ գործող օրենքը սահմանում է կայքի միայն բովանդակային սահմանափակում: Դրա համաձայն, գովազդը չպետք է գերազանցի տվյալ կայքի 20%-ից ավելին: Ընդ որում, տարբերակում չկա՝ կայքը լրատվական է, թե ոչ: Իսկ, օրինակ, մանկապատանեկան, կրթական, բժշկական, սոցիալական կայքերում վիճակախաղերի գովազդն ընդհանրապես արգելվում է:
Կառավարության առաջարկած նախագիծն այսօր խորհրդարանում քննարկելու ընթացքում ԱԺ «Իմ քայլը» խմբակցության պատգամավոր Բաբկեն Թունյանը համոզմունք հայտնեց, որ կայքի մակերեսի 20 տոկոսը որոշելը խնդրահարույց է, մինչդեռ ժամային սահմանափակումն, ըստ նրա, լրատվամիջոցների համար տեխնիկական խնդիր չի առաջացնի:
«Ցավոք, վերջին 1-1.5 տարվա դինամիկան ցույց է տալիս, որ խաղադրույքների ծավալը Հայաստանում ոչ թե նվազել է, այլ գնալով աճում է, ընդ որում, ճգնաժամային իրավիճակներում ավելի ինտենսիվ է աճել: Այսինքն՝ մարդիկ օնլայն են սկսում խաղալ: Իսկ օնլայն տիրույթում այդ խաղադույքների դեմն առնելու ամենաճիշտ պայքարը հենց գովազդի սահմանափակումն է, որպեսզի ամեն քայլափոխի այդ գովազդները մարդկանց չգայթակղեն շահումների գումարով»,- ասաց Թունյանը:
Պատգամավորը նշեց, որ եթե այս նախագիծը զուտ տեխնիկական է, ապա արդեն շրջանառության մեջ դրված ոլորտի կանոնակարգմանն ուղղված նախագծերի փաթեթը կարող է ամբողջությամբ վերահսկողություն սահմանել շահումով խաղերի նկատմամբ:
Թունյանը հայտնեց նաև, որ այդ փաթեթն արդեն որոշ լրատվամիջոցների մոտ անհանգստություն է առաջացրել:
Հայուհու «մետաքսե արտույտը» կամ հաջողակ բիզնես-լեդիի պատմությունը
«Ինձ հետ արդեն բազում լրատվամիջոցներից կապ են հաստատել ու մտահոգություն հայտնել, որովհետև այդ սահմանափակումները ենթադրում են իրենց եկամուտների որոշակի նվազում: Ես իրենց խոսք եմ տվել ու այս ամբիոնից ևս մեկ անգամ խոսք եմ տալիս, որ մենք այդ ձևափոխությունները մինչև ընդունելը մանրամասն իրենց հետ կքննարկենք»,- ասաց նա՝ միաժամանակ հայտարարելով, որ խիստ սահմանափակումներն անխուսափելի են լինելու:
Նշենք, որ ԱԺ-ում քննարկվող նախագծով առաջարկվում է գովազդի ժամը խախտող լրատվամիջոցների նկատմամբ կիրառել տուգանք՝ նվազագույն աշխատավարձի 1000-ապատիկի չափով, այսինքն՝ 1 մլն դրամով:
