Աշոտ Մելիքյանի դիտարկմամբ` խնդիրը բավականաչափ փաստարկներ ունի` և՛ կողմ, և՛ դեմ, ուստի նպատակահարմար է անդրադառնալ շահումով խաղերի ու համապատասխան կազմակերպությունների գործունեության պայմաններին, նպատակահարմարությանը։ Ըստ նրա`շահումով խաղերն ու տոտալիզատորները դարձել են բիզնեսի կարևորագույն մասը, բավականին շատ գումարներ են գնում բյուջե, բայց մյուս կողմից էլ ակնառու է այն իրողությունը, թե դրանք ինչ կործանարար ազդեցություն են ունենում հասարակության մեջ։
«Մարդիկ, չգիտես ինչու, որոշում են, որ շահումով խաղերին մասնակցելու դեպքում կարող են մեծ գումարներ վաստակել, մինչդեռ այդկերպ պարզապես տներ են քանդվում։ Խաղամոլության համար ստեղծվում են բարենպաստ պայմաններ, ինչն ուղղակի անթույլատրելի է։ Ոլորտը բացի բիզնես դիտարկելուց, կա նաև հարցի բարոյական կողմը։ Հասկանալի է նաև, որ այդ բիզնեսը հիմնված է իր գովազդային գործունեության վրա»,– Sputnik Արմենիային ասաց Խոսքի ազատության պաշտպանության կոմիտեի նախագահը։
Մելիքյանի խոսքով` դա նաև լրատվամիջոցների գովազդի շոշափելի մասն է, բայց լրատվամիջոցները նույնպես պետք է հաշվի առնեն, որ շահումով խաղերի գովազդն ընտանիքներ է քանդում։ Ըստ նրա` լրատվամիջոցի գործունեությունը միայն բիզնես չէ, իհարկե դասական առումով նա պետք է գոյատևի իր վաստակած գումարներով, սակայն պետք է հաշվի առնի նաև հարցի բարոյական կողմը։
Խոսքի ազատության պաշտպանության կոմիտեի նախագահի կարծիքով` քննարկումների միջոցով պետք է գտնել ոսկե միջինը, որովհետև եթե բերվեն փաստարկներ նաև հօգուտ լրատվամիջոցների, ապա առաջ կգա մի շատ պարզ և հասկանալի իրողություն, Հայաստանում գործող բիզնեսի տեսակները համապատասխանաբար տալիս են գովազդներ, և լրատվամիջոցը մեղավոր չէ, որ մեզ մոտ տնտեսությունը վատ վիճակում է, այլ ոլորտներում բիզնեսները կայացած չեն և չեն կարող մեծ ծավալների գովազդ տրամադրել, ինչպես շահումով խաղեր կազմակերպող ընկերությունները։
Մելիքյանի համոզմամբ` լավ կլինի, եթե վերոհիշյալ օրենսդրական նախագիծը ևս մեկ անգամ ծանրութեթև արվի, որպեսզի հնարավոր լինի գտնել օպտիմալ տարբերակ։
Տեղեկացնենք, որ պատգամավորների օրենսդրական նախաձեռնությամբ առաջարկվում է օրենքի 15-րդ հոդվածում կատարել համապատասխան փոփոխություն և լրացումներ, որի արդյունքում ինտերնետ շահումով խաղերի և տոտալիզատորի գովազդների հանդեպ կկիրառվեն նույն սահմանափակումները, որոնք կիրառվում են շահումով խաղերի և խաղատների գովազդների նկատմամբ։
ՀՀ–ում գործող լրատվամիջոցներից շատերն իրենց էջերում ու եթերում զետեղում են շահումով խաղերի և տոտալիզատորի գովազդներ, որոնցից ստանում են շահույթ և որոնք որոշ լրատվամիջոցների պարագայում հանդիսանում են ֆինասական եկամտի աղբյուր։
