ԵՐԵՎԱՆ, 19 մարտի — Sputnik. Ազգային ժողովի փոխնախագահ Ալեն Սիմոնյանն այսօր լրագրողների հետ զրույցում ասաց, որ շատ վատ է գնահատում բարձր տեխնոլոգիաների նախարար Հակոբ Արշակյանի երեկվա պահվածքը։ Երեկ Արշակյանը երևանյան սրճարաններից մեկում հարվածել էր իրեն մոտեցած և հարցեր տված լրագրող Փայլակ Ֆահրադյանին։
«Շատ վատ եմ գնահատում, շատ վատ։ Պարոն Արշակյանը իմ լավ ընկերն է, պարկեշտ անձնավորություն, ինքն էլ է ցավագին տարել, որ չի կարողացել նյարդերին տիրապետել։ Որքան էլ սադրանքներ և լարված իրավիճակ լիներ, չէր կարելի», – ասաց Սիմոնյանը։
Նրա խոսքով` ոչ մի դեպքում բռնությունը արդարացում չունի։
«Միանշանակ դատապարտում եմ արարքը։ Պարոն Արշակյանն ասել է, որ պատրաստ է պատասխանատվություն կրել, ինչը գնահատելի է», – ասաց փոխխոսնակը։
Հիշեցնենք` Փայլակ Ֆահրադյանը մոտեցել է նախարարին ու հարցրել, թե ինչու է նախարարն աշխատանքային ժամը որոշել անցկացնել սրճարանում: Արշակյանը խնդրել է լրագրողին անջատել տեսախցիկը, այնուհետև սկսել է սպառնալ: Լրագրողը բարձրացել է սրճարանի երկրորդ հարկ և սկսել աշխատել։ Հակոբ Արշակյանը լրագրողի հետևից բարձրացել է ու հարվածել նրան, ինչպես նաև կոտրել վերջինիս համակարգիչը։
Վեճից առաջ Հակոբ Արշակյանը կնոջ հետ ընդմիջում է արել սրճարանում. տեսանյութ և մանրամասներ
Երեկ երեկոյան Հակոբ Արշակյանը ներողություն խնդրեց միջադեպին ներկա բոլոր քաղաքացիներից, որոնց հանգիստը խաթարել է իր արարքով։ Արշակյանը գրառման վերջում նշել էր, որ պատրաստ է պատասխանատվություն կրել միջադեպի կապակցությամբ։
Հիշեցնենք` նախորդ տարվա ապրիլին Ալեն Սիմոնյանի ու «Ադեկվադի» հիմնադիրներից Արթուր Դանիելյանի միջև ծեծկռտուք էր տեղի ունեցել։
