ԵՐԵՎԱՆ, 10 մարտի - Sputnik. Հայրենիքի փրկության շարժման համակարգող Իշխան Սաղաթելյանը հայտնում է, որ չնայած Ազգային ժողովի մուտքերը շրջափակված են, սակայն որոշ պատգամավորների հաջողվել է ներս մտնել։
«ՀՀ արժանապատիվ քաղաքացիները շարունակում են փակ պահել ԱԺ–ի մուտքերը՝ թույլ չտալով Հայաստանի շահերին հակասող խորհրդարանին շարունակել գործունեությունը։ Պարզվեց, որ բացի պատգամավորների համար նախատեսված մուտքերից, Ազգային ժողովն ունի նաև տնտեսական մուտք, որը նախատեսված է տարատեսակ տնտեսական ապրանքներ՝ կարտոֆիլ, սոխ, այլ մթերքներ, տարբեր իրեր Ազգային ժողով տեղափոխելու համար։ Այսօր առավոտյան մի քանի պատգամավորներ Ազգային ժողով են մտել հենց այդ մուտքից»,–ֆեյսբուքյան իր էջում գրել է Սաղաթելյանը։
Նա դիմել է պատգամավորներին` ասելով, որ ընտրությունը նրանցն է՝ կա՛մ ընտրելու են արժանապատվությունը և կարողանալու են ազատ շրջել հայրենիքում, կա՛մ ընտրելու են Նիկոլ Փաշինյանին և ստիպված են լինելու աշխատասենյակ հասնել թունելներով և տնտեսական մուտքերով։
ՀՀ նախագահն իր գործունեությամբ ընդդիմությանը դրդում է ավելի ակտիվ գործելու. քաղտեխնոլոգ
«Ժամանակն է ընտրելու՝ կա՛մ Նիկոլ, կա՛մ Հայաստան»,–իր խոսքը եզրափակել է Սաղաթելյանը։
Նշենք, որ Բաղրամյան պողոտայում անընդմեջ բողոքի ակցիա իրականացնող Հայրենիքի փրկության շարժման մասնակիցներն ու ՀՀ վարչապետ Նիկոլ Փաշինյանի հրաժարականը պահանջող քաղաքացիները մարտի 9–ից փակել են նաև Դեմիրճյան փողոցի` ԱԺ ծառայողական մուտքը` վրաններ խփելով այնտեղ։
