Արտակ Դավթյանին ԶՈւ ԳՇ պետի պաշտոնում նշանակելու վարչապետի միջնորդության հիմնական պատճառն այն չեզոք վարքագիծն է, որը Դավթյանը դրսևորել է վերջին շրջանում։ Sputnik Արմենիայի հետ զրույցում նման կարծիք հայտնեց ռազմական մեկնաբան Դավիթ Հարությունովը։
«Դավթյանն այն քիչ զինվորականներից է, որը չի միացել Փաշինյանի հրաժարականի հայտարարությանը։ ԶՈւ շուրջ քաղաքական ղեկավարության մոտեցումները հիմնականում կապված են այդ լոյալության հետ, որովհետև փաստացի տեղի է ունեցել գործընթաց, որի հետևանքով ԶՈւ հիմնական կորիզը չի ենթարկվել քաղաքական իշխանությանը»,- ասաց նա։
Թե ինչ հնարավորությունների և մասնագիտական որակների կրող է ԳՇ պետի նոր թեկնածուն, Հարությունովը հրաժարվում է որևէ կերպ մեկնաբանել։ Ասում է` այդ մասին լիարժեք տեղեկություններ չունի։
Դավթյանին նախկին պաշտոնին վերականգնելու առաջարկի երկրորդ նախադրյալը, ըստ Հարությունովի, այն է, որ պատերազմից հետո, երբ թե՛ գործող, թե՛ նախկին բարձրաստիճան զինվորականներից ոմանք հանդես էին գալիս տարբեր հայտարարություններով, հարցազրույցներով, նա, լինելով պաշտոնաթող զինվորական, երբևէ հանդես չի եկել իշխանությունների հասցեին հրապարակային քննադատությամբ։
«Արտակ Դավթյանը նշանակվում է, որ բանակը մինչև վերջ քանդի». Մովսես Հակոբյան
Հարությունովի դիտարկմամբ` Արտակ Դավթյանը հարմար թեկնածու է նաև այնքանով, որ պատերազմի ժամանակ անմիջական մասնակցություն և կապ չի ունեցել ռազմական գործողությունների կառավարման հետ, ինչը հնարավորություն կտա բացահայտելու պատերազմի ժամանակ զինվորականների թույլ տված սխալներն ու պատժել մեղավորներին։
Հարցին, թե արդյոք դեռևս հոկտեմբերին Հայաստանի հարավային դարպասի պաշտպանությունը կոորդինացնելու նպատակով Սյունիք մեկնած Դավթյանի գործունեության մեջ թերացումներ չե՞ն եղել, և արդյոք նա կարո՞ղ է լիարժեք մաքուր վարկանիշ ունենալ, Հարությունովը նշեց, որ նրա նկատմամբ քննադատությունները չեն կարող այնքան հնչեղ լինել, որքան բուն ռազմական գործողություններին ակտիվ մասնակցություն ունեցած զինվորականների։
«Ո՛չ քաղաքական, ո՛չ ռազմական ղեկավարությունը, որն ինչ-որ ձևով առնչվել է մարտական պատրաստության, ԶՈւ-ի հետ, չի կարելի ասել, որ ընդհանարապես պատասխանատվություն չի կրում, բայց մյուսների համեմատ, որոնք շատ ավելի ակտիվ դեր էին խաղում բուն ռազմական գործողությունների ընթացքում, նրա դերը կարող է ավելի քիչ լինի»,- հավելեց ռազմական մեկնաբանը։
Հիշեցնենք` այսօր ՀՀ վարչապետը միջնորդություն է ներկայացրել նախագահ Արմեն Սարգսյանին Զինված ուժերի գլխավոր շտաբի պետի պաշտոնում Արտակ Դավթյանին նշանակելու համար։
Դավթյանն արդեն զբաղեցրել է այս պաշտոնը։ Նա ՀՀ ԶՈւ գլխավոր շտաբի պետ է եղել 2018 թվականի մայիսի 24-ից մինչև 2020 թվականի հունիսի 8-ը։ Այդ պաշտոնից ազատվել է կորոնավիրուսի ժամանակ որդու հարսանիքը կազմակերպելու համար։
2021թ. մարտի 9-ին Արտակ Դավթյանը ՀՀ պաշտպանության նախարար Վաղարշակ Հարությունյանի հրամանով նշանակվել էր հատուկ հանձնարարություններով ավագ սպա:
