ԵՐԵՎԱՆ, 5 մարտի – Sputnik․ ՀՀ Ազգային ժողովի աշխատակազմի նախկին ղեկավար-քարտուղար Արա Սաղաթելյանն ազատ արձակվեց դատարանի դահլիճից։ ՀՀ Վերաքննիչ դատարանը փոխեց Երևանի ընդհանուր իրավասության դատարանի որոշումը Սաղաթելյանի խափանման միջոցի վերաբերյալ։
«ՀՀ-ում կատարվել է տոտալ անօրինակություն, մարդկանց քմահաճույքների պատճառով պարոն Սաղաթելյանը 20 հազար րոպեից ավելի, այսինքն՝ 14 օր գտնվել է անազատության մեջ։ Ես սա որպես հաղթանակ չեմ դիտարկում, դիտարկում եմ որպես հաղթանակի սկիզբ, որովհետև միանգամայն հանցագործության հետ կապ չունեցող անձին իր բնական միջավայրից հանել են և պահել են լրիվ անօրինական կարգով ՔԿՀ-ում»,- լրագրողների հետ զրույցում նշեց Սաղաթելյանի պաշտպան Միհրան Պողոսյանը։
Պաշտպանի խոսքով՝ դատարանն արձանագրել է, որ Սաղաթելյանին ներկայացված մեղադրանքի որևէ հոդվածով հիմնավոր կասկած առկա չէ։
Պաշտպանը պնդում է, որ այս գործով իրենք լիարժեք հաղթանակ կարձանագրեն այն դեպքում, երբ «տոտալ անօրինակության հետ առնչություն ունեցած բոլոր պաշտոնատար անձինք լրիվ օրինական հիմքերով կհայտնվեն ՔԿՀ-ի ներսում»։
Արա Սաղաթելյանին կարող են այցելել միայն կինն ու երեխան
Մինչ դատարանի վճռի հրապարակումը լրագրողների հետ զրույցում ԱԱԾ նախկին տնօրեն, «Հայրենիք» կուսակցության առաջնորդ Արթուր Վանեցյանը նշեց, որ Արա Սաղաթելյանը միանշանակ հետապնդվում է իր քաղաքական հայացքների համար։
«Պարոն Սաղաթելյանին ձերբակալել են արդեն մոտ 10 օր և այդ ֆեյք օգտատերը մինչ այժմ շարունակում է շատ ակտիվ, անգամ ավելի ակտիվ գրառումներ անել համացանցում»,- նշեց Վանեցյանը։
ՎԵՏՕ հասարակական շարժման ակտիվիստ Նարեկ Մալյանի կարծիքով՝ իշխանությունները հասարակությանը փորձում են շեղել ֆեյքի պատմություններով, մինչդեռ հարցն ավելի խորն է։
«Ես հավատում եմ, որ կոնկրկետ նպատակ կա բանտարկելու, լռեցնելու Արա Սաղաթելյանին, պատվեր կա միգուցե Ադրբեջանից»,- նշեց Մալյանը՝ հիշեցնելով, թե որքան մեծ գործ է արել Արա Ասաղթելյանը հակաադրբեջանական քարոզչության համար։
Հիշեցնենք՝ ավելի վաղ Երևանի ընդհանուր իրավասության դատարանը որոշում կայացրեց բավարարել ԱԱԾ միջնորդությունն ու 2 ամսով կալանավորել Արա Սաղաթելյանին։
Սաղաթելյանին մեղադրանք էր առաջադրվել ՀՀ քրեական օրենսգրքի 226 հոդվածով (ազգային, ռասայական կամ կրոնական թշնամանք հարուցելը), 226.2 հոդվածով (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը) և 307.4 հոդվածով (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը)։
Այս նույն գործով կալանավորված է Սաղաթելյանի ընկեր Արամ Սարգսյանը, իսկ Մհեր Ավագյանն ու քաղաքագետ Կարեն Բեքարյանն ազատ են արձակվել։
