ԵՐԵՎԱՆ, 25 փետրվարի - Sputnik. ՀՀ վարչապետ Նիկոլ Փաշինյանը հրամայեց բոլոր զինվորներին, սպաներին, գեներալներին զբաղվել իրենց գործով` ՀՀ սահմանների և տարածքային ամբողջականության պահպանմամբ։ Փաշինյանը նման հրաման տվեց այսօր` Հանրապետության հրապարակում իր ելույթի ժամանակ։
Նշենք, որ վարչապետը ելույթից առաջ մեկ րոպե լռություն հայտարարեց` ի հիշատակ պատերազմի զոհերի։
«ԳՇ–ի հայտարարությունը ռազմական հեղաշրջման փորձ է, սակայն ժողովուրդը դա թույլ չի տա։ Համոզված եմ, որ շատ գեներալներ այդ հայտարարությունը ստորագրել են իրենց հրամանատարների հրամանի ներքո։ Բանակը չի կարող ետ նայել, բանակը պետք է ենթարկվի ժողովրդին և ժողովրդի ընտրած քաղաքական իշխանությանը»,–ասաց վարչապետը։
Նրա խոսքով` այն սպաները, որոնք լքել են ծառայության վայրերը, պետք է հետ վերադառնան ու երկրի անվտանգությունը վերահսկեն։
Հիշեցնենք` ՀՀ ԶՈւ Գլխավոր շտաբն այսօր` փետրվարի 25-ին, պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության Հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։
