ԵՐԵՎԱՆ, 3 փետրվարի – Sputnik. Ռուսաստանի արտգործնախարարության պաշտոնական ներկայացուցիչ Մարիա Զախարովան, մեկնաբանելով Ալեքսեյ Նավալնու գործի կապակցությամբ Արևմուտքի կողմից հակառուսական պատժամիջոցների կիրառման հնարավորությունը, հայտարարել է, որ նման քայլերի համար այդ երկրներին առիթ պետք չէ, հաղորդում է ՌԻԱ Նովոստին:
«Նրանք թքած ունեն հարցի էության վրա, դա հաստատ է։ Նրանց որևէ առիթ է պետք։ Եթե կա, նրանք այն դուրս կբերեն ամենամութ անկյունից, եթե չկա՝ կհորինեն կամ կստեղծեն: Սա մարտավարություն է, որը եղել է 2020թ․-ին, 2016-ին, 2011-ին։ Զսպման փորձի այս քաղաքականությունն իրականացվում է արդեն երկար տարիներ։ Եվ մենք տեսնում ենք, որ նրանք միանգամայն տարբեր առիթներ են օգտագործում։ Նրանց պետք չէ իմանալ իրականությունը, խորանալ հարցի էության մեջ, հասկանալ», — ասել Է դիվանագետը «Սոլովյով LIVE»-ի եթերում։
Փետրվարի 2-ին Մոսկվայի Սիմոնովյան դատարանը որոշում է կայացրել չեղարկել Նավալնու պայմանական ժամկետը «Իվ Ռոշե»-ի գործով և փոխարինել 3,5 տարի ժամկետով բանտարկությամբ՝ ընդհանուր ռեժիմի գաղութում: Դրանից հետո շատ երկրներ, այդ թվում՝ ԱՄՆ-ն, Գերմանիան, Ֆրանսիան և Մեծ Բրիտանիան, Ռուսաստանի իշխանություններին կոչ են արել ազատ արձակել նրան։
Եվրոպան փորձում է փրկել Ռուսաստանի հետ հարաբերություններն ու իր ապագան
Ավելի վաղ Նավալնիի հետ կապված իրավիճակը մեկնաբանող օտարերկրյա քաղաքական գործիչներին ԱԳՆ-ն խորհուրդ էր տվել հարգել միջազգային իրավունքը և զբաղվել իրենց երկրների խնդիրներով: Գերատեսչության ղեկավար Սերգեյ Լավրովը նշել էր, որ այդ թեմայով արևմտյան քաղաքական գործիչների հայտարարությունները կարծես «պատճենահանող սարքից են գալիս»։ ՌԴ նախագահի մամուլի քարտուղար Դմիտրի Պեսկովը հայտարարել էր, որ Կրեմլում մտադիր չեն ականջալուր լինել Նավալնիի մասին արտերկրից հնչող հայտարարություններին:
Դատարաններն արդեն երեք անգամ քննել են Նավալնու պայմանական ժամկետը իրական ժամկետով փոխարինելու մասին ՊԿԴԾ-ի(Պատժի կատարման դաշնային ծառայություն) հայտերը և ամեն անգամ մերժել են՝ միայն երկարացնելով փորձաշրջանը։ Բայց միայն վերջին երեք տարիների ընթացքում, ըստ ՊԿԴԾ-ի, Նավալնին առնվազն 60 անգամ չի ներկայացել քրեակատարողական տեսչությանը (նա պարտավոր է դա անել ամիսը երկու անգամ) և բազմաթիվ վարչական պատիժներ է ստացել՝ խոշոր տուգանքներից մինչև ձերբակալություններ:
Այդ փաստերից յուրաքանչյուրն առանձին-առանձին և բոլորը միասին, ըստ օրենքի, դատապարտյալին սպառնում են զրկել ժամկետը պայամանական անցկացնելու արտոնությունից։ Այդ միջոցը Ռուսաստանում բավականին հաճախ է կիրառվում․ միայն նախորդ տարի պայմանական ժամկետն իրականով են փոխարինել 11,3 հազար, իսկ 2019թ․-ին՝ ավելի քան 15 հազար մարդու դեպքում։
Պնդումները, թե Նավալնուն հետապնդում են բացառապես քաղաքական գործունեության համար, Մարդու իրավունքների եվրոպական դատարանը հերքել է. Ստրասբուրգը «Իվ Ռոշե»-ի գործով քաղաքական ենթատեքստ չի հայտնաբերել (հենց այդ գործով էր բողոք ներկայացվել), թեև տնային կալանքի համար փոխհատուցման որոշում է կայացվել, որն ամբողջությամբ վճարվել է Ռուսաստանի իշխանությունների կողմից:
