ԵՐԵՎԱՆ, 31 հունվարի - Sputnik. Այսօր ժամը 15։00-16։00 ընկած ժամանակահատվածում Գորիս-Սիսիան ճանապարհին սպասվում է ձյունամրրկի պոռթկում. քամու արագությունը կհասնի 30մ/վ-ի, իսկ Զանգերի հատվածում՝ 15մ/վ-ի։ ԱԻՆ մամուլի ծառայությունը զգուշացնում է վարորդներին՝ ռիսկի չդիմել ու չսպասել իրավիճակի մոտալուտ փոփոխություն. երեկ մարզում սկսված ձնաբուքը կդադարի միայն գիշերը։
Ուստի Գորիս-Սիսիան ճանապարհահատվածը և Վարդենյաց լեռնանցքը շարունակում են փակ մնալ։ Այս պահին Գորիսի և Իշխանասարի ուղղություններով կան մեծ թվով ավտոմեքենաների կուտակումներ։
«Հարգելի՛ վարորդներ, հորդորում ենք հետ վերադառնալ և սպասել լրացուցիչ տեղեկությունների նշված ճանապարհահատվածի անցանելիության վերաբերյալ։ Կրկին անգամ կոչ ենք անում՝ գյուղամիջյան ճանապարհներով դուրս չգալ այդ հատված և չստեղծել լրացուցիչ դժվարություններ»,- հորդորում և զգուշացնում է ԱԻՆ-ը։
Հավելենք, որ ԱԻՆ, տարածքային ինքնակառավարման մարմինների, ճանապարհային ոստիկանության և այլ գերատեսչությունների համատեղ ուժերով միջոցներ են ձեռնարկվում արգելափակված ավտոմեքենաները դուրս բերելու և քաղաքացիներին օգնություն ցուցաբերելու համար։ Ներգրավվել է լրացուցիչ տեխնիկա։
Հիշեցնենք, որ նախօրեին Գորիս-Սիսիան ավտոճանապարհին արգելափակումից դուրս է բերվել 298 ավտոմեքենա և 94 քաղաքացու ցուցաբերել համապատասխան օգնություն։
Ավելի վաղ տեղեկացրել էինք, որ հունվարի 31-ին՝ ժամը 15։00-ից մինչ 17։00-ն Վարդենյանց լեռնանցքում, Սիսիան-«Զանգեր», Հարժիս-Շինուհայր, Ալագյազ-Ծաղկահովիտ հատվածներում, Պուշկինի լեռնանցքում սպասվում են 15-30 մ/վ բքի ուժեղ պոռթկումներ։
