ԵՐԵՎԱՆ, 31 հունվարի - Sputnik. System of a Down ռոք խումբը թողարկել է Genocidal Humanoidz երգի տեսահոլովակը՝ Արցախին օգնությանն ուղղված դրամահավաք իրականացնելու նպատակով։
Ավելի վաղ խմբի ֆեյսբուքյան էջում նշվել էր, որ System of a Down-ը հունվարի 30-ին կազմակերպում է առցանց դրամահավաք ՝ աջակցելու Արցախի պատերազմում վիրավորված զինծառայողներին:
«2020 թվականի նոյեմբերի 10-ին ստորագրված հրադադարի հայտարարությունից հետո հակամարտության ընթացքում վիրավորված հերոսները շարունակում են պրոթեզավորման, առաջադեմ բուժման և բժշկական օգնության խիստ կարիք ունենալ: Մենք կազմակերպում ենք ուղիղ հեռարձակմամբ դրամահավաք միջոցառում, որպեսզի գումար հավաքենք ձեռքերը և ոտքերը կորցրած հարյուրավոր զինվորների վերականգնման և վերջույթների պրոթեզներով ապահովման համար:
Ֆինանսավորումը կօգնի նաև լազերային թերապիայի ներդրմանը` սպիտակ ֆոսֆորի քիմիական այրվածքները բուժելու, սպիները մեղմացնելու և ծանր ցավը նվազեցնելու համար: Ուղիղ հեռարձակումից ստացված բոլոր միջոցները կտրամադրվեն այս գործին»,-ասված է գրառման մեջ:
2 սպանված, 163 վիրավոր քաղաքացիական անձ. Արցախի ՄԻՊ-ը նոր տվյալներ է ներկայացրել
Հավելենք, որ ըստ ՀՀ աշխատանքի և սոցիալական հարցերի նախարարության նախնական գնահատման` պրոթեզավորման կարիք ունի պատերազմի մասնակից շուրջ 115 անձ։
