ԵՐԵՎԱՆ, 29 հունվարի – Sputnik. Եթե քաղաքացիներն իրենց կյանքի ընթացքում աշխատել են ԵԱՏՄ անդամ երկրներից առնվազն երկուսում, կենսաթոշակային աշխատանքային ստաժը, որն ընկած է ԵԱՏՄ անդամ բոլոր պետություններում կենսաթոշակային իրավունքների ձևավորման հիմքում, կարող է գումարվել: Տեղեկությունն այսօր` հունվարի 29–ին, հայտնել է Եվրասիական տնտեսական հանձնաժողովի (ԵԱՏՀ) տնտեսության և ֆինանսական քաղաքականության հարցերով կոլեգիայի անդամ (նախարար) Տիմուր Ժակսիլիկովը Sputnik Արմենիա մուլտիմեդիոն կենտրոնում կայացած Մոսկվա-Բիշքեկ-Երևան-Մինսկ-Նուր-Սուլթան տեսակամրջի ընթացքում։
«Թոշակի անցնելիս այսուհետ կհաշվարկվի նաև այն աշխատանքային ստաժը, որը մարդը ձեռք է բերել այլ երկրում բնակվելիս», - պարզաբանել է հանձնաժողովի ղեկավարը:
Նա նաև ընդգծել է, որ ընդունված փաստաթուղթը նախատեսում է կենսաթոշակի «արտահանում», այսինքն՝ մարդն իր ընտրությամբ է որոշում՝ կենսաթոշակ ստանալ այն երկրում, որի քաղաքացի է, թե՞ այնտեղ, որտեղ փաստացի բնակվում է։
Ժակսիլիկովը վստահ է, որ համաձայնագիրը, որն ուժի մեջ մտած է համարվում 2021 թ․-ի հունվարի 1-ից, կնպաստի աշխատանքային պայմանագրերի օրինականացմանը:
Այդ առնչությամբ նա նկատել է․ «Ռուսաստանում միգրանտներն ավելի շատ են, քան ցույց է տալիս պաշտոնական վիճակագրությունը։ Մեծ մասը նախընտրում է այս կամ այն պատճառով աշխատել չվերահսկվող, ոչ պաշտոնական հատվածում, և, բնականաբար, նրանք կենսաթոշակային ֆոնդին հատկացումներ չեն անում, ինչն ի վերջո, ազդում է իրենց սեփական կենսաթոշակի վրա»:
Թվեր և փաստեր. Հայաստանը 6 տարվա ընթացքում որքա՞ն առևտուր է արել ԵԱՏՄ–ում
Համաձայնագիրը գործում է Եվրասիական տնտեսական միության բոլոր պետությունների՝ Ռուսաստանի, Ղազախստանի, Բելառուսի, Հայաստանի և Ղրղզստանի տարածքում, բայց ուժ ունի միայն այս տարվանից. համաձայնագիրը նախորդ տարիները հաշվի չի առնում:
