ԵՐԵՎԱՆ, 22 հունվարի – Sputnik. Բարձրագույն դատական խորհրդի անդամի թեկնածու Դավիթ Խաչատուրյանն այսօր ԱԺ–ում, պատասխանելով անկախ պատգամավոր Թագուհի Թովմասյանի հարցին, վստահեցրեց` իրեն չի կաշկանդում այն հանգամանքը, որ «Բաց հասարակության հիմնադրամների» տնօրենների խորհրդի նախագահն է եղել։
Թովմասյանը նշել էր, որ Խաչատուրյանը երկար տարիներ աշխատել է «Բաց հասարակության հիմնադրամում», ըստ էության, կատարել մասնավոր պատվերներ։ Պատգամավորի խոսքով` բազմիցս հնչել են կարծիքներ, որ «Սորոսի» հիմնադրամը գործում է ՀՀ–ի դեմ։
Ի պատասխան Խաչատուրյանը շեշտեց` դրանք ընդամենը խոսակցություններ են։
«Որպես ԲԴԽ անդամ` գործելու եմ բացառապես ՀՀ շահերից ելնելով։ Իսկ հիմնադրամների գործունեության մասին խոսակցությունները չեն ազդում իմ նվիրվածության վրա։ Չէի ուզենա արձագանքել խոսակցություններին, քանի դեռ դրանք փաստեր չեն։ Այդ խոսակցությունների ուժգնությունն ինձ չի կաշկանդում։ Բալզակն ասում է` ինչպես հազար ճագարից չես կարող մի ձի ստանալ, այնպես էլ հազար կասկածից մեկ ապացույց չես կարող ստանալ»,–ասաց նա։
Խաչատուրյանի խոսքով` հիմնադրամը բավական կարևոր նախաձեռնություններ է կատարել կրթական, դատական ոլորտում. նախկին իշխանությունների ժամանակ այլընտրանքային փորձագետներով զեկույցներ են պատրաստել և ՄԱԿ ներկայացրել։
Ավելին, ԲԴԽ անդամի թեկնածուն հիշեցրեց, որ իր գործընկերներից մեկը`Հրայր Ղուկասյանը, 4 տարի այդ նույն հիմնադրամի տնօրենների խորհրդի անդամ էր և ՀՀ երրորդ նախագահ Սերժ Սարգսյանի իրավական հարցերով օգնական նշանակվեց։
«Ես չեմ ասում` վատ բան է, ուղղակի տարբերակված մոտեցման մասին եմ խոսում` չի ասվում, որ ուրիշներն էլ են աշխատել այնտեղ»,–ասաց նա։
Ինչ վերաբերում է իր եղբոր` ՀՔԾ պետ Սասուն Խաչատրյանի և իր հետագա գործունեության համատեղելիությանը` Խաչատուրյանը նշեց, որ նախ ՀՔԾ–ն քննում է բոլոր նախաքննական մարմինների 5 տոկոսից ոչ ավել գործերը։ Բացի այդ, ըստ նրա, փաստը, որ ԲԴԽ անդամ կարող է լինել մի եղբայրը, ՀՔԾ պետ` մյուսը, շահերի բախում չի առաջացնում։
Նա հիշեցրեց, որ տարիներ առաջ իր հայրը Վճռաբեկ դատարանի նախագահն է եղել, իսկ եղբայրն էլ դատախազությունում է աշխատել։ Երբ քաղաքացիներից մեկը ՄԻԵԴ է դիմել` կասկածի տակ դնելով իր հոր անաչառությունը, ՄԻԵԴ–ն արձանագրել է, որ ազգակցական կապը չի կարող ազդեցություն ունենալ, և դիմումն անհիմն է ճանաչվել։
Հիշեցնենք, որ ԱԺ–ում արտահերթ նիստ է ընթանում, որի շրջանակում ԲԴԽ անդամներ են ընտրում։ Ազգային ժողովի «Իմ քայլը» խմբակցությունը Բարձրագույն դատական խորհրդի անդամի թեկնածու է առաջադրել Դավիթ Խաչատուրյանին և Գագիկ Ջհանգիրյանին։
ԼՀԿ–ն ու ԲՀԿ–ն հայտնել են, որ չեն մասնակցելու քվեարկությանը։
Դատավորը պետք է «գողականներից», ընդդիմությունից և իշխանությունից անկախ լինի. Ջհանգիրյան
