ԵՐԵՎԱՆ, 8 հունվարի - Sputnik. Անկարան պատրաստ է Ֆրանսիայի հետ հարաբերությունների կարգավորմանը՝ չնայած որոշ հարցերի շուրջ լուրջ տարաձայնություններին, որոնց պատճառով երկրների միջև զգալի լարվածություն է առաջացել։ Այս մասին, Reuters-ի փոխանցմամբ, Լիսաբոնում իր պորտուգալացի գործընկերոջ հետ հանդիպումից հետո հայտարարել է Թուրքիայի ԱԳ նախարար Մևլութ Չավուշօղլուն։
Ընդ որում, նախարարը վկայակոչել է հարաբերությունների կարգավորման մի ճանապարհային քարտեզ, որի վրա երկրները աշխատում են։
«Եթե Ֆրանսիան անկեղծ է, Թուրքիան պատրաստ է կարգավորել հարաբերությունները նրա հետ», — ասել է Չավուշօղլուն։
Նախարարը պատմել է, որ կառուցողական զրույց է ունեցել Ֆրանսիայի արտաքին քաղաքական գերատեսչության ղեկավար Ժան Իվ Լե Դրիանի հետ։ Կողմերը պայմանավորվել են աշխատել հաշտեցման ճանապարհային քարտեզի վրա։
Թուրքիայի և Ֆրանսիայի միջև լարվածությունն անցյալ տարվանից է ծագել և աստիճանաբար սրվել է Սիրիայի, Լիբիայի, Միջերկրածովյան և Ղարաբաղյան հակամարտության շուրջ տարաձայնությունների պատճառով:
2020 թվականի հոկտեմբերին Թուրքիայի նախագահ Ռեջեփ Թայիփ Էրդողանն անգամ կասկածի տակ դրեց Ֆրանսիայի նախագահ Էմանուել Մակրոնի հոգեկան առողջությունը, երբ վերջինս հայտարարեց «լուսավորյալ իսլամի» ստեղծման անհրաժեշտության մասին:
Էրդողանը ֆրանսիացի գործընկերոջը մեղադրեց իսլամի դեմ «ատելության արշավ» կազմակերպելու մեջ։ Դեկտեմբերի սկզբին արդեն Էրդողանը հույս էր հայտնել, որ Ֆրանսիան «որքան հնարավոր է շուտ կազատվի» Մակրոնից, ինչպես նաև բազմիցս վիրավորել էր նրան:
