ԵՐԵՎԱՆ, 10 դեկտեմբերի - Sputnik. Թուրքիայի նախագահ Ռեջեփ Թայիփ Էրդողանը, մեկնաբանելով Ֆրանսիայի խորհրդարանի ընդունած բանաձևը, հայտարարել է, որ Ֆրանսիայի նախագահ Էմանուել Մակրոնը քաղաքականություն չի սովորել։
Ավելի վաղ Ֆրանսիայի Ազգային ժողովը (խորհդարանի Ստորին պալատը) Լեռնային Ղարաբաղի ճանաչման անհրաժեշտության մասին բանաձև էր ընդունել` կառավարությանը կոչ անելով ճանաչել Արցախի անկախությունը։ Միաժամանակ Ֆրանսիայի արտգործնախարար Ժան-Իֆ Լը Դրիանը ելույթ էր ունեցել Ստորին պալատի նիստում և ասել, որ դեմ է Ֆրանսիայի կողմից Լեռնային Ղարաբաղի ճանաչմանը։
«Այստեղ կարևոր են առաջնորդի որակները։ Դու իրավունք չունես վեր կենալու ու ասելու, որ (Ղարաբաղը. խմբ․) պետություն է՝ ելնելով քո խորհրդարանի որոշումից։ Նույնիսկ Փաշինյանը չի համարձակվում դա անել, իսկ դու ուզում ես առաջ տանել։ Մակրոնը քաղաքականություն չսովորեց։ Հնարավոր է՝ այս երեկո նա ինձ վրա բարկացած լինի, բայց մենք ստիպված ենք ասել ճշմարտությունը», - ասել է Էրդողանը Բաքվում կայացած ասուլիսի ժամանակ։
Հիշեցնենք` խորհրդարանի բանաձևից առաջ`նոյեմբերի 25-ին էլ Ֆրանսիայի Սենատն էր Արցախի անկախության մասին բանաձևի նախագիծ ընդունել` դատապարտելով ԼՂ–ի դեմ սեպտեմբերի 27-ին սանձազերծված ադրբեջանա-թուրքական ռազմական ագրեսիան։
