ԵՐԵՎԱՆ, 7 հունվարի - Sputnik. Ստամբուլի դատարանը կալանքի տակ է վերցրել Թուրքիայի պետանվտանգության երկու նախկին սպաների՝ հայտնի հայազգի լրագրող, «Ակոս» թերթի խմբագիր Հրանտ Դինքի սպանության գործով։ Թուրքական Anadolu գործակալությունը, վկայակոչելով դատարանի գաղտնի աղբյուրը, հաղորդում է, որ Վոլքան Շահինն ու Վեյսալ Շահինը մեղավոր են ճանաչվել նախապատրաստվող սպանության մասին իմանալու և ոչինչ չձեռնարկելու համար։
Գործով ևս երկու կասկածյալների՝ թուրքական ժանդարմերիայի նախկին սպա Ալի Օզի, ինչպես նաև Էջևիթ Էմիրի նկատմամբ խափանման միջոցը շարունակում է մնալ ստորագրությունը Թուրքիայից չհեռանալու մասին, ևս մեկը՝ Էմրե Չինգեզը, կարող լքել Ստամբուլը։
Դատական հաջորդ նիստը կկայանա վաղը` հունվարի 8-ին։
Հիշեցնենք, որ անվանի պոլսահայ լրագրող Հրանտ Դինքի սպանության ծրագրմանն ու իրականացմանը մասնակցելու մեջ մեղադրվող մի քանի տասնյակ անձանց թվում կան նաև բարձրաստիճան պաշտոնյաներ`Ստամբուլի անվտանգության նախկին պետ Ջելալէթթին Ջերահը, Ստամբուլի հետախուզության բաժնի նախկին տնօրեն Ահմեթ Իլհան Գյուլերը, անվտանգության գլխավոր վարչության հետախուզության բաժնի նախկին տնօրեններից Ռամազան Աքյուրեքը, Սաբրի Ուզունը, Էրգին Դինչը, Տրապիզոնի ժանդարմերիայի հրամանատար, գնդապետ Ալի Օզը և այլք։
Դինքի սպանությունը լիովին չի բացահայտվի, քանզի ընդգրկված են պետական կառույցներ. Մելքոնյան
Սա Թուրքիայի ամենաաղմկահարույց դատական գործերից է, որը շարունակվում է արդեն 14 տարի։
Թուրքիայում հրատարակվող հայկական «Ակոս» թերթի հիմնադիր խմբագրապետ Հրանտ Դինքին 2007թ. հունվարի 19-ին թերթի խմբագրատան առջև սպանեց 16–ամյա Օգյուն Սամասթը։
