ԵՐԵՎԱՆ, 26 դեկտեմբերի – Sputnik. «Հայրենիք» կուսակցության խորհրդի անդամ Արսեն Բաբայանն անդրադարձել է լուրերին, թե ընդդիմությունը մարդկանց գումարով է բերում ցույցերին։
«Քիչ առաջ ոստիկանության՝ իմ վստահելի աղբյուրներից տեղեկություն ստացա, որ բեմադրում են կեղծ գաղտնի ձայնագրություն։ Ըստ այդ թատերականացված կեղծ ձայնագրության՝ իբր Հանրապետության հրապարակում տեղադրված վրաններից մեկում խոսում են մարդկանց գումարով հրապարակ բերելու մասին։ Ըստ ՊՈԱԿ-ներում աշխատող էժան սցենարիստների` իբր այդ վրանում քննարկվում է, թե որքան պետք է վճարվեն մարդիկ, որպեսզի գան հանրահավաքի և գիշերեն հրապարակում»,– Facebook-ում գրել է Բաբայանը։
Նրա խոսքով` այդ ձայնագրության բեմադրիչները այն նույն անձինք են, ովքեր 44 օր կեղծ ձայնագրությունն էիր տարածում, որպեսզի համոզեն հանրությանը, թե Գետաշենն ու Շահումյանն են ազատագրել։
«Այդ կեղծ ձայնագրությունները ստեղծելով ու տարածելով` Նիկոլի անբարոյական քարոզչամեքենան հանրությանը փորձում էր խաբել, թե ազատագրվել է Գետաշենն ու Շահումյանը»,– գրում է նա։
Հիշեցնենք`Հայրենիքի փրկության շարժման ակտիվիստները դեկտեմբերի 25-ին, ժամը 18։00-ից փակել էին Երևանի մի շարք փողոցներ՝ պահանջելով Փաշինյանի անհապաղ հրաժարականը: Երևանի տարբեր հատվածներում տեղի ունեցած ակցիաների հետևանքով կաթվածահար էր եղել Երևանի մի շարք կարևոր տրանսպորտային հանգույցների երթևեկությունը, մասնավորապես` Բաղրամյան պողոտայի, Սարալանջի խճուղու, Աբովյան փողոցի ու Մյասնիկյան պողոտայի։
Խնդիրն իշխանություն–ընդդիմություն կոնֆլիկտի մեջ չէ. Վահե Հովհաննիսյանը` ճգնաժամի մասին
Բողոքի ակցիաներն ավարտվել են Հանրապետության հրապարակում` քաղաքի տարբեր վայրերից դեպի հրապարակ կազմակերպված երթերից հետո։
Արդեն մի քանի օր է, ինչ ընդդիմության ակտիվիստները նաև գիշերում են հրապարակում տեղադրված վրաններում` բողոքի շրջանակներում նստացույց իրականացնելով։
Մենք իշխանության չենք ձգտում. Սեյրան Օհանյանը միացել է ընդդիմության հանրահավաքին
