ԵՐԵՎԱՆ, 22 դեկտեմբերի - Sputnik. ՀՀ ազգային անվտանգության ծառայության աշխատակիցները, ովքեր պարեկություն են անում Սյունիքի մարզի Գորիս-Կապան ավտոճանապարհին, Հայաստանի քաղաքացիներին հատուկ հեռախոսահամարներ են բաժանում՝ արտակարգ դեպքերում զանգահարելու համար։
Խորհուրդ է տրվում նաև վարորդներին պատահական մարդկանց չնստեցնել իրենց մեքենան ու որքան հնարավոր է արագ անցնել ճանապարհի 4 կիլոմետրանոց հատվածը, որը ըստ GPS համակարգի՝ գտնվում է Ադրբեջանի տարածքում։
Սոցցանցերում տարածված այս տեղեկությունը Sputnik Արմենիային հաստատեցին ԱԱԾ սահմանապահ ծառայությունից։
Բանն այն է, որ Հայաստանի ու Ադրբեջանի սահմանների դելիմիտացիայի ու դեմարկացիայի արդյունքում մայրուղու մի քանի հատվածներ համընկնում են սահմանագծի հետ, ու ադրբեջանական ստորաբաժանումների հետ հանդիպման վտանգ կա։ Հաշվի առնելով Արցախում քաղաքացիներին գերեվարելու տխուր փորձը, այս ճանապարհով երթևեկությունը վտանգավոր է դարձել։
Հենց այդ պատճառով Գորիսից Կապան ուղևորվող քաղաքացիներին հեռախոսահամարներ են բաժանվում։ Դրանք են՝ +374 98 386250, 98 386252, 98 386253, 15 361893։
Ինչպես պարզաբանեցին ԱԱԾ-ից, տարածքում սահմանապահների դիտակետ է տեղակայված։ Նրանք մանրամասն հրահանգավորում են մարդկանց՝ ինչպես անցնել ճանապարհահատվածը, ինչ անել տարբեր տեսակի արտակարգ դեպքերի ժամանակ։ Հարկ եղած դեպքում սահմանապահներն ուղեկցում են նրանց։
ԱԱԾ-ից Sputnik Արմենիային տեղեկացրեցին, որ մինչև համապատասխան պաշտոնական հաղորդագրությամբ ՀՀ ԱԱԾ սահմանապահ զորքերի թեժ գծի հեռախոսահամարի տարածումը քաղաքացիների խնդրանքով և նրանց աջակցելու նպատակով տրվել են մամուլում շրջանառվող այդ հեռախոսահամարները, որոնք լայն տարածում են գտել հանրության շրջանում և ի նպաստ քաղաքացիների կիրառվել են նաև հիշյալ հաղորդագրությանը հաջորդող օրերին։ Սակայն ներկայումս գործում է միայն նշված թեժ գծի հեռախոսահամարը, պահպանվում է ՀՀ ԱԱԾ–ի կողմից տարածված պաշտոնական հաղորդագրության տրամաբանությունը, ԱԱԾ սահմանապահ զորքերի կողմից քաղաքացիներին որևէ խուճապային հրահանգներ չեն տրվում, այլ ըստ անհրաժեշտության կատարվում է որոշակի խորհրդատվություն։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր, որոնք մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
