ԵՐԵՎԱՆ, 20 դեկտեմբերի - Sputnik. Սյունիքի մարզի որոշ հատվածներում ռուս սահմանապահների տեղակայումն արդյոք կարո՞ղ է Հայաստանի ինքնիշխանության կորուստ համարվել։ «Զինուժ մեդիայի» հետ հարցազրույցում ՀՀ ՊՆ նախարար Վաղարշակ Հարությունյանը նշել է՝ ինքնիշխանության կորուստ կարող է համարվել այն իրավիճակը, երբ անվտանգությունն ապահովված չէ։
Գորիս-Կապան ճանապարհին լիարժեքորեն ապահովվելու է բնականոն ու անվտանգ երթևեկություն․ ԱԱԾ
«Այն քայլերը, որոնք ամրապնդում են անվտանգությունը, ամրապնդում են և՛ պետության անկախությունը, և՛ ինքնիշխանությունը»,- ընդգծում է նախարարը։
Նա վստահեցնում է՝ այն աշխատանքները, որոնք այսօր արվում են, նաև Ռուսաստանի և Ադրբեջանի միջև ձեռքբերված պայմանավորվածությունները թույլ են տալիս պնդել, որ ճանապարհների անվտանգությունն ապահովված է։
«Գորիս-Դավիթ Բեկ 21 կիլոմետրանոց ճանապարհը հսկողության տակ են վերցնում ռուսական խաղաղապահ զորքերը։ Մեր սահմանապահ զորքերը կանգնում են մեր տարածքում և վիզուալ վերահսկում են այդ ճանապարհը՝ ապահովելով երկրորդ շերտի անվտանգությունը։ Մեր սահմանապահ զորքերի հետևում կանգնած է մեր բանակը, և ձեռք է բերված պայմանավորվածություն, որ մեր սահմանապահ զորքերի և ճանապարհի այդ հատվածում որևիցե զորք չի լինելու։ Նույնը վերաբերում է Ադրբեջանին. վիզուալ հսկողության տակ ադրբեջանական սահմանապահ զորքերն են, հետևում՝ իրենց զորքը։ Այնտեղ էլ սահմանապահ զորքերի և ճանապարհի արանքում չպետք է լինի որևէ զինված ստորաբաժանում»,- նշում է նախարարն ու վստահեցնում, որ այս իրավիճակում ճանապարհի անվտանգությունը երաշխավորված է։
Լրագրողը հարց է ուղղել նախարարին, որը վերաբերում է համացանցում տարածված տեսանյութերին. դրանցում ադրբեջանցի զինվորականները բնակավայրերին մոտ են կամ դրոշով քայլում են ճամփեզրով։ Լրագրողը խնդրել է մեկնաբանել դրանք և նշել, թե որքանով անվտանգ են Սյունիքում ճանապարհները այս պարագայում։
Նախարարի խոսքով՝ տեսանյութերը, որոնք այսօր ի հայտ են եկել, մի քանի օր առաջ են նկարահանվել։Նա նշել է՝ «միջադեպեր կարող են լինել, որ սահմանին մոտ գան, հիմա աշխատանքներ են տարվում»։
Գորիսի քաղաքապետը կոչ է անում արգելել Փաշինյանի մուտքը Սյունիք
«Այստեղ մտահոգվելու որևէ բան չկա, պետք է ուշադիր լինել։ Եթե այդպիսի դեպքեր են լինում՝անհասկանալի մեր քաղաքացիների համար, ապա իրենք պետք է կապվեն ԱԱԾ-ի թեժ գծով և այդ ինֆորմացիան ամբողջովին ներկայացնեն, և համապատասխան միջոցներ կձեռնարկվեն, որ մեր հանրությունն իմանա։ Բայց պետք չէ պանիկայի ենթարկվել, տեսանյութ է գնում համացանցում չորս օրվա, կարող է մեկ ուրիշ տեսանյութ լինի, այնպես որ պետք է այստեղ շատ հստակ գործել»,- նշում է նախարարը։
Նշենք, որ այսօր համացանցում տեսանյութ էր տարածվել, որտեղ երևում էր, որ Գորիս–Կապան ճանապարհի Մ2–ի Որոտանի հատվածում ադրբեջանական բանակի զիծառայողներ են հայտնվել` իրենց դրոշով։
