ԵՐԵՎԱՆ, 17 դեկտեմբերի – Sputnik. Սեպտեմբերի 27-ին Ադրբեջանի սանձազերծած պատերազմում վիրավորված զինծառայողները Զինծառայողների աջակցության հիմնադրամից կսկսեն աջակցություն ստանալ նաև մինչև հաշմանդամության կարգի որոշումը։ Կառավարության համապատասխան որոշման նախագիծն այսօր գործադրի նիստում ներկայացրեց ՀՀ աշխատանքի և սոցիալական հարցերի նախարար Մեսրոպ Առաքելյանը։
«Հաշմանդամություն ստացած քաղաքացիները հիմնադրամի կողմից, համաձայն օրենքով սահմանված կարգի ու ժամկետների, ստանում են աջակցություն։ Սակայն, հաշվի առնելով, որ այդ գործընթացը որոշակի ժամանակ է ենթադրում։ Կապված առողջացման գործընթացի հետ` միջոցառումն առաջարկում է, որ որոշ հիվանդությունների դեպքում, երբ ակնհայտ է, որ այդ քաղաքացիներն առաջիկայում ստանալու են հաշմանդամության խումբ, մինչև հաշմանդամության խմբի ստացումը հնարավորություն կստանան հիմնադրամի կողմից աջակցություն ստանալու` առավելագույնը 6 ամիս ժամկետով»,– ասաց նախարարը։
Առաքելյանը հայտնեց, որ այս պահին հիմնադրամի ամսական աջակցությունը նման դեպքերի համար կազմում է 100 000 դրամ։ Կառավարությունն առաջարկում է պետական բյուջեի միջոցներով այդ աջակցությունն ավելացնել ևս 200 000–ով` այն հասցնելով 300 000 դրամի` մինչև հիմնադրամի հիմնական շահառու դառնալն ու ըստ հաշմանդամության կարգի սահմանված չափով գումար ստանալը։
Հիշեցնենք, որ արցախյան պատերազմի ընթացքում վիրավորվածների թվի վերաբերյալ պաշտոնական տեղեկություն չկա։
