ԵՐԵՎԱՆ, 17 դեկտեմբերի, Sputnik. Կողմերը Լեռնային Ղարաբաղում պետք է կանգ առնեն այնտեղ, որտեղ եղել են եռակողմ հայտարարության ստորագրման ժամանակ, հայտարարել է ՌԴ նախագահ Վլադիմիր Պուտինը ամենամյա մեծ ճեպազրույցի ժամանակ։
«Եռակողմ հայտարարության շրջանակներում մենք պայմանավորվել ենք, որ մարտական գործողությունները դադարեցվում են ու, որ շատ կարևոր է, պայմանավորվել ենք, որ կողմերը կանգ են առնում այնտեղ, որտեղ հասել են մեր եռակողմ հայտարարության ստորագրման պահին»,- ասել է Պուտինը։
Այդ առնչությամբ, ինչպես նշել է ՌԴ նախագահը, տեխնիկական բազմաթիվ հարցեր են առաջանում։ Դրանք կապված են ենթակառուցվածքների հետ՝ 2 կողմերի համար էլ։ Բայց դա պետք է հանգիստ քննարկվի բանակցությունների միջոցով։
Եռակողմ հայտարարությունը դրա համար բոլոր հնարավորությունները տալիս է, քանի որ այնտեղ նշված է, որ հրադադարից հետո հաջորդ փուլը պետք է լինի տարածաշրջանում իրպավիճակի ամբողջական կարգավորումը տնտեսական ու ենթակառուցվածքային պոտենցիալի բացահայտմամբ, այդ թվում՝ ավտոմոբիլային ու երկաթուղային։
«Դա վերաբերում է և Նախիջևանին, և Հայաստանի հյուսիսի ու հարավի միջև հաղորդակցությանը»,-ասել է Պուտինը։
Ռազմական գործողությունների դադարեցման պայմանավորվածությունը շատ կարևոր է, քանի որ դադարեցնում է արյունահեղությունը։ Մարդիկ այլևս չեն սպանվում։ Դա, ըստ Պուտինի, ամենակարևորն է, մնացածը երկրորդական բաներ են։
Պուտինը նշել է, որ հրադադարի ռեժիմը խախտվել է մեկ անգամ։ Նա հույս է հայտնել, որ դա միակ խախտումն էլ կմնա, ու կողմերին կհաջողվի բանակցություններ սկսել Ռուսաստանի կամ ԵԱՀԿ Մինսկի խմբի միջնորդությամբ։
Պուտինը նաև հույս է հայտնել, որ միջազգային միջնորդներն ու կազմակերպությունները խոսքից կանցնեն գործի, կսկսեն օգնել մարդկանց, ովքեր դրա կարիքն ունեն՝ չթողնելով դա միայն Ռուսաստանի վրա։ Առաջին հերթին՝ Լեռնային Ղարաբաղ վերադարձողներին։
