Այսօր Երևանում մարդիկ կրկին փողոց էին դուրս եկել` պահանջելով վարչապետ Նիկոլ Փաշինյանի հրաժարականը։ Երթը մեկնարկեց Սասունցի Դավթի արձանի մոտից։ Ընդդիմադիրները անցան կենտրոնական մի շարք փողոցներով և երթն ավարտեցին Սայաթ–Նովա փողոցում։
Նախկին ԱԱԾ տնօրեն Արթուր Վանեցյանը իր խոսքում ասաց, որ ակցիաները շարունակվելու են։
«Մենք միասին «ո՛չ» ենք ասում այս սրիկաներին, հեռացնելու ենք դավաճաններին։ Մեր շարքերը խտանում են, մեզ ամեն օր ավելի շատ մարդիկ են միանում», – նշեց նա։
Ընդդիմության վարչապետի թեկնածու Վազգեն Մանուկյանն էլ ասաց, որ Նիկոլ Փաշինյանը մարդասպան է։
«ժողովուրդ» բառն օգտագործելով` Նիկոլ Փաշինյանը դիմում է մանիպուլյացիայի. իրավապաշտպան
«Նա ոչ միայն այս 5000 մարդկանց է սպանել, այլև Եռաբլուրում թաղվածներին է երկրորդ անգամ սպանել։ Ես նրանց մեծ մասին ճանաչում էի», – ավելացրեց Մանուկյանը։
ՀՅԴ Գերագույն մարմնի ներկայացուցիչ Իշխան Սաղաթելյանն էլ հայտարարեց, որ վաղվա ակցիայի առանցքային պահանջը լինելու է Փաշինյանի դեմ պետական դավաճանության հոդվածով գործ հարուցելը։
«Հայերը պետք է միավորվեն, որ Փաշինյանի հեռանալուց հետո միասին լուծենք բոլոր խնդիրները։ Ավստրալիայից մինչև Փարիզ ու Մոսկվա, բոլոր հայերը պետք է միասնական լինեն», – ասաց նա։
Վաղը շարունակվելու է անհնազանդության երթը, ընդդիմադիրներն ակցիաներ են անելու իրավապահ մարմինների շենքերի դիմաց` վերջում հասնելով ԱԱԾ։
Հիշեցնենք՝ նոյեմբերի 9–ին ստորագրված եռակողմ հայտարարությունից հետո ընդդիմությունը պարբերաբար բողոքի ակցիաներ է կազմակերպում Երևանում` պահանջելով Նիկոլ Փաշինյանի հրաժարականը։ Դեկտեմբերի 3-ին հայտնի դարձավ, որ ընդդիմությունն առաջարկում է ժամանակավոր կառավարություն ստեղծել, որը կգլխավորի ՀՀ նախկին վարչապետ, Հանրային խորհրդի նախկին նախագահ Վազգեն Մանուկյանը։
Ինչի՞ համար է մեր կառավարությունը. Գյումրիում պահանջում են Փաշինյանի հրաժարականը
