ԵՐԵՎԱՆ, 14 դեկտեմբերի – Sputnik. Երևանի ընդհանուր իրավասության դատարանն այս պահին քննում է ՀՀԿ անդամ, նախկին պատգամավոր Վահրամ Բաղդասարյանին կալանավորելու միջնորդությունը։ Դատարանի բակում հավաքված են Բաղդասարյանի կուսակից ընկերները։
ՀՀԿ խոսնակ Էդուարդ Շարմազանովը Բաղդասարյանի նկատմամբ հարուցված քրեական գործը լրագրողների հետ զրույցում «քաղաքական հետապնդում» որակեց։
«Ակնհայտ է, որ հողատու Նիկոլ Փաշինյանը վախերի մեջ է և փորձում է ձերբակալություններով, կալանավորումներով, իրավական տեռոր իրականացնելով հասարակության առողջ հատվածին, նաև ընդդիմադիրներին հետ պահել վճռական գործողություններից` իր հրաժարականը պահանջելու առումով։ Բոլորիս վրա կան նման դատական գործեր»,– ասաց Շարմազանովը։
Հիշեցնենք` Վահրամ Բաղդասարյանը ձերբակալվել էր իշխանության յուրացման (ՀՀ քրեական օրենսգրքի 300.1 հոդվածի 1-ին մաս), պետական, քաղաքական կամ հասարակական գործչի գործունեությունը դադարեցնելու նպատակով սպանություն նախապատրաստելու (305-րդ հոդված) և ապօրինի զենք-զինամթերք պահելու (235-րդ հոդված) մեղադրանքներով։
Մեղադրանքն առաջադրվել էր նոյեմբերի 15-ին, եռակողմ հայտարարության ստորագրումից հետո հարուցված քրեական գործերի շրջանակներում։
ԱԱԾ–ն պահանջում է Վարդան Այվազյանին կալանավորել «օծանելիքների ու ժամացույցների» գործով
