ԵՐԵՎԱՆ, 13 դեկտեմբերի – Sputnik. Եվրոպայի չեմպիոն Գևորգ Ղարիբյանը պարտվեց քառորդ եզրափակիչում, իսկ ահա գերծանր քաշային Դավիդ Օվասապյանը երկու անընդմեջ հաղթանակներից հետո մտել է կիսաեզրափակիչ, որտեղ հաղթանակի դեպքում կապահովի առնվազն արծաթե մեդալը։
130 կգ քաշային կարգում Դավիդ Օվասապյանը առաջին գոտեմարտում 3։1 հաշվով պարտության մատնեց սերբ Բոբան Ժիվանովիչին։ Քառորդ եզրափակիչում մեր ըմբիշը ծանր գոտեմարտում կարողացավ թեքել հաղթանակի նժարը իր կողմը չիլիացի Յասմանի Ֆերնանդեսի հետ պայքարում։ Կիսաեզրափակիչում Օվասապյանի մրցակիցն է լինելու Ռուսաստանի ներկայացուցիչ Սերգեյ Սեմյոնովը։
63 կգ քաշային կարգում Եվրոպայի չեմպիոն Գևորգ Ղարիբյանը իր առաջին գոտեմարտում ուժերը չափեց թուրք Աբդուռահման Աթլանի հետ։ Առաջին մրցափուլում վաստակելով 3 միավոր՝ Ղարիբյանը պահպանեց իր առավելությունն ու իվերջո հաղթեց 3։1 հաշվով։ Քառորդ եզրափակիչում Ղարիբյանը 3։4 հաշվով պարտվեց ղրղզ Կալի Սուլեյմանովին։
67 կգ քաշային կարգում Սլավիկ Գալստյանը բրոնզե մեդալի համար գոտեմարտելու է ուկրաինացի Արթուր Պոլիտաևի հետ։ Իսկ ահա 77 կգ քաշային Կարապետ Չալյանը երրորդ տեղի համար գոտեմարտում մրցելու է սերբ Վիկտոր Նեմեշի հետ։
Բրոնզե մեդալի համար հավակնություններ կարող է ունենալ նաև օլիմպիական չեպիոն Արթուր Ալեքսանյանը, որը պարտվեց աշխարհի չեմպիոն Մուսա Եվլոևին։ Ռուսաստանցին հասել է կիսաեզրափակիչ, ու եթե մտնի եզրափակիչ, ապա Ալեքսանյանը հնարավորություն կունենա պայքարելու երրորդ տեղի համար։ Նույնը կարելի է ասել Գևորգ Ղարիբյանի համար։ Եթե ղրղզ Կալի Սուլեյմանովը մտնի եզրափակիչ՝ Ղարիբյանն էլ կկարողանա շարունակել պայքարը մեդալի համար։
Հիշեցնենք, որ հունահռոմեական ոճի Հայաստանի հավաքականը աշխարհի անհատական գավաթի խաղարկությանը մասնակցում է տասը ըմբիշներով։ Ռուդիկ Մկրտչյանը (55կգ), Արմեն Մելիքյանը (60կգ), Ռուբեն Ղարիբյանը(82կգ), Արթուր Շահինյանը (87կգ) արդեն դուրս են մնացել մեդալների համար պայքարից։
