ԵՐԵՎԱՆ, 11 դեկտեմբերի - Sputnik. Այսօր առավոտյան՝ ժամը 9․30-ի սահմաններում, մի խումբ քաղաքացիներ վարչապետ Նիկոլ Փաշինյանի հրաժարականի պահանջով բողոքի ակցիա են իրականացրել նաև Երևանի մետրոպոլիտենի «Գործարանային» կայարանում։ Դեպքի առթիվ քրեական գործ է հարուցվել։ Տեղեկությությունը հայտնում է ՀՀ ոստիկանության մամուլի ծառայությունը։
«Մի խումբ անձինք, իրացնելով ակցիա իրականացնելու, հավաքներ կազմակերպելու և անցկացնելու իրենց իրական կամ ենթադրյալ իրավունքները, տևական ժամանակ խոչընդոտել են գնացքների բնականոն աշխատանքը՝ քաղաքացիներին զրկելով ազատ տեղաշարժվելու իրենց սահմանադրական իրավունքի իրացման հնարավորությունից, ինչի հետևանքով էական վնաս է պատճառվել անձանց իրավունքներին, օրինական շահերին, ինչպես և պետության ու հասարակության շահերին»,- որպես քրեական գործի հարուցման մեկնաբանություն՝ նշված է ոստիկանության հաղորդագրության մեջ։
Նշվում է, որ քրրեական գործն արդեն ուղարկվել է տարածքային քննչական բաժին։
Երևանի մետրոպոլիտենի բնականոն աշխատանքը վերականգնվել է
Հիշեցնենք` դեկտեմբերի 8-ին ևս քաղաքացիական անհնազանդության ակցիա էր իրականացվել Երևանի մետրոպոլիտենում։ Ակցիան դարձյալ սկսվել էր «Գործարանային» կայարանից` խափանելով մետրոպոլիտենի ամբողջ աշխատանքը։
Հավելենք, որ Արցախում հրադադար հաստատելու վերաբերյալ եռակողմ հայտարարության ստորագրումից հետո ընդդիմադիր ուժերը պահանջում են վարչապետ Նիկոլ Փաշինյանի հրաժարականը։ Վարչապետի՝ Հայրենիքի փրկության շարժման միասնական թեկնածուն Հանրային խորհրդի նախկին նախագահ Վազգեն Մանուկյանն է։
