ԵՐԵՎԱՆ, 10 դեկտեմբերի – Sputnik. Արցախի արտակարգ իրավիճակների պետական ծառայությունը հայտնում է, որ այսօր ողբերգական ավտովթար է տեղի ունեցել Ստեփանակերտ-Ասկերան ավտոճանապարհին, որի հետևանքով երկու մարդ է մահացել։
«Ահազանգ է ստացվել, որ Ստեփանակերտ-Ասկերան ավտոճանապարհի 4-րդ կիլոմետրում տեղի է ունեցել ՃՏՊ։ Պարզվել է, որ «Սուզուկի վիտարա» մակնիշի ավտոմեքենան դուրս է եկել երթևեկելի գոտուց և բախվել ՌԴ խաղաղապահ զորակազմին պատկանող «Ուրալ» մակնիշի ավտոմեքենային: Դեպքի հետևանքով «Սուզուկի վիտարայի» վարորդը և ուղևորը տեղում մահացել են»,–նշված է հաղորդագրության մեջ։
Վթարի հետևանքով մահացածների ինքնությունը պարզվում է:
Արցախի արտակարգ իրավիճակների պետական ծառայությունը նշում է նաև, որ ՃՏՊ-ների մեծ մասի պատճառն անբարենպաստ եղանակային պայմաններն են: Մառախուղի, անձրևի կամ ձյունաթափի պատճառով ստեղծվում է անբավարար տեսանելիություն:
