ԵՐԵՎԱՆ, 10 դեկտեմբերի – Sputnik. Հումանիտար ականազերծման կենտրոնի ռուս զինծառայողները Արցախում պայթուցիկ նյութերից մաքրել են 71 հեկտար տարածք, 24 կմ ճանապարհ։ Տեղեկությունը լրագրողներին հայտնել է Կողմերի հաշտեցման ռուսական կենտրոնի ղեկավար Դմիտրի Պերեպելկինը, փոխանցում է ՌԻԱ Նովոստին։
Նրա խոսքով՝ ընդանուր առմամբ հայտնաբերվել և ոչնչացվել է ավելի քան 4,5 հազար պայթյունավտանգ առարկա։ Սակրավորները մաքրում են տարածքը, էլեկտրահաղորդման գծերի հենարանները, գազատարներն ու ենթակառուցվածքների մյուս օբյեկտները։
«Չպայթած զինամթերքը տեղափոխում են հատուկ ռազմափորձարան կամ ոչնչացնում են հենց տեղում։ Տարածքի ականազերծման աշխատանքների ընթացքում կիրառվում են ժամանակակից ռոբոտատեխնիկական համալիրներ»,-պարզաբանել է Պերեպելկինը։
Անդրադառնալով ենթակառուցվածքների թեմային, կենտրոնի ղեկավարը հայտնել, որ էլեկտրամատակարարման համակարգը վերականգնված է 85 տոկոսով, վերսկսված է նաև գազի մատակարարումը բնակելի տներին։
«Կրկին հասանելի են բջջային կապն ու ինտերնետը, լիովին վերականգնված է գազատարը և ջեռուցման մատակարարումը բնակելի տներին»,-ավելացրել է ռուսական խաղաղապահ ուժերի ներկայացուցիչը։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
