ԵՐԵՎԱՆ, 10 դեկտեմբերի – Sputnik. ԱՊՀ արտգործնախարարների խորհրդի այսօր կայացած նիստի ընթացքում Հայաստանի և Ադրբեջանի ներկայացուցիչները փոխադարձ մեղադրանքներ են հնչեցրել, հայտնում է Sputnik-ի թղթակիցը։
Մասնավորապես, ՀՀ արտաքին գործերի փոխնախարար Արմեն Ղևոնդյանը հայտարարել է, որ ԱՊՀ անդամ ոչ բոլոր պետություններն են համամիտ վեճերի և հակամարտությունների խաղաղ կարգավորման դիրքորոշման հետ։
Ինչպես նշել է Ղևոնդյանը՝ մինչև օրս տվյալներ են ստացվում հայ ռազմագերիների և զոհերի մարմինների հանդեպ անմարդկային վերաբերմունքի, ինչպես նաև ադրբեջանական կողմից վանդալիզմի և հուշարձանների պղծման մասին։
Ի պատասխան Ադրբեջանի փոխարտգործնախարարը հայտարարել է, որ միայն հայտնվելով լիակատար պարտության շեմին՝ Հայաստանի ղեկավարությունը համաձայնել է դադարեցնել մարտական գործողությունները:
Դրա հետ մեկտեղ երկու փոխնախարարներն էլ շնորհակալություն են հայտնել Ռուսաստանին՝ Արցախում խաղաղության վերականգնման ուղղությամբ միջնորդական ջանքերի համար։
Ո՛չ մեռնելուց եմ վախենում, ո՛չ դատվելուց. անհետ կորածի հայրը փորձեց հարվածել հրամանատարին
Նշենք, որ ԱՊՀ արտգործնախարարների խորհրդի նիստը կայացել է Ուզբեկստանի նախագահությամբ՝ տեսակոնֆերանսի ձևաչափով։ Բանակցությունների ընթացքում մասնակիցները մտքեր են փոխանակել տարածաշրջանային և միջազգային խնդիրների շուրջ։ Մասնակիցները քննարկել են նաև մի շարք փաստաթղթերի նախագծեր, որոնք նախատեսվում է ստորագրել ԱՊՀ մասնակից պետությունների ղեկավարների խորհրդի առաջիկա նիստում:
