ԵՐԵՎԱՆ, 3 դեկտեմբերի – Sputnik. Սյունիքի մարզի Տեղ համայնքի բնակիչներն ամուր կանգնած են իրենց դիրքերում։ Sputnik Արմենիայի հետ զրույցում համայնքի ղեկավար Ներսես Շադունցն այս մասին հայտարարելով` հաստատեց լուրերը, որ ադրբեջանցիներն այսօր համայնքի տարածքին են մոտեցել։
Սոցցանցերում լուրեր են շրջանառվում, որ ադրբեջանցի զինվորները Սյունիքի մարզում Տեղ համայնքի սահման են գնացել։ Ադրբեջանի զինված ուժերի ներկայացուցիչները, ըստ լուրերի, երեկ կեսօրին նույնպես մոտեցել են սահմանը հսկող հայկական ջոկատին։ Ադրբեջանցիներն ասել են, թե նոյեմբերի 9-ի հայտարարության համաձայն՝ հայերը պետք է հետ գնան։
«Ադրբեջանցիները եկել էլ են, գնացել էլ են։ Հետո նորից են եկել ու նորից գնացել։ Ավելին, դեռ էլի են գալու-գնալու։ Ինչքան էլ գան, հետ են գնալու։ Մենք մեր վարչական տարածքի տարածքներում մեր բարձունքներում կանգնած են, անհոգ եղեք, բայց մի բան մի մոռացեք` Երևանը սկսվում է Տեղ համայնքից»,–ասաց Շադունցը։
Սկանդալի հետքերով․ սահմանազատման վերաբերյալ բանակցությունները Բաքվի հետ դժվար են լինելու
Նա վստահեցրեց` մեկ քայլ անգամ հետ չեն գնացել։ Շադունցը հայտնեց նաև, որ հիմա քննարկվում են սահմանազատման հարցեր, սակայն համայնքի բնակիչներն արդեն իսկ կանգնած են այն տարածքում, որը քարտեզով մերն է։
Շադունցը հավելեց` տեղում ռուս խաղաղապահներ էլ կան, որոնք իրենց գործն են անում` սահմանազատման աշխատանքներ կատարելով։ Այս պահին էլ, ըստ Տեղ համայնքի ղեկավարի, զրուցում են խաղաղապահների հետ։
Նա խորհուրդ տվեց Facebook–ի լուրերը չկարդալ։
Նշենք, որ Տեղ խոշորացված համայնքը 60 կմ երկարությամբ սահմանակից է Ադրբեջանին։
Քարվաճառում դարպասը ժամանակավոր էր. սահմանազատում է արվում Սոթքի հանքավայրի տարածքով. ՊՆ
