ԵՐԵՎԱՆ, 27 նոյեմբերի – Sputnik. Իրավիճակը Լեռնային Ղարաբաղում շարունակում է կայունանալ։ Տեղեկությունն այսօր ճեպազրույցի ժամանակ հայտնել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Շաբաթվա ընթացքում իրավիճակը Ղարաբաղում շարունակել է կայունանալ, հրադադարի ռեժիմի խախտումներ, ինչպես նաև ռուս խաղաղապահ զորախմբի հանդեպ սադրանքներ չեն արձանագրվել», - ասել է Զախարովան, ավելացնելով, որ նոյեմբերի 9-ի եռակող հայտարարության իրականացումն ընթանում է առանց լուրջ միջադեպերի։
Նրա խոսքով՝ նշված դրական միտումները ծանրակշիռ ապացույց են, որ Ռուսաստանի, Հայաստանի ու Ադրբեջանի առաջնորդների հաստատած ուղին ճիշտ էր ու այս պահին այն գործնականում իրագործվում է կողմերի կողմից։
Մարիա Զախարովան շեշտում է, որ ռուս խաղաղապահները շարունակում են բարենպաստ պայմաններ ստեղծել փախստականների վերադարձի համար, ականազերծում են իրականացնում ու որոնում անհետ կորածներին։
Աշխատում է նաև հումանիտար արձագանքման կենտրոնը։ Դրա աշխատանքին մասնակցելու են տասնյակ դաշնային նախարարություններ, գերատեսչություններ ու գործակալություններ, ինչպես նաև Հայաստանի ու Ադրբեջանի պրոֆիլային նախարարությունները։
«Հույս ունենք, որ Ռուսաստանի կողմից իրականացվող համալիր միջոցառումները ինչպես Հայաստանի և Ադրբեջանի, այնպես էլ շահագրգիռ արտասահմանյան գործընկերների ու կառույցների հետ, կնպաստեն Հարավային Կովկասում խաղաղությանն ու անվտանգությանը», - նշել է Զախարովան։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
