ԵՐԵՎԱՆ, 24 նոյեմբերի - Sputnik. «Հայաստան» համահայկական հիմնադրամի կողմից Հայաստանի Հանրապետությանը նվիրաբերված միջոցները մուտքագրվել են գանձապետական միասնական հաշվին։ Որպես նվիրաբերություն փոխանցված ամբողջ գումարը կազմում է 52,703,113.3952 հազար ՀՀ դրամ։ Տեղեկությունը հայտնում է ՀՀ ֆինանսների նախարարության մամուլի ծառայությունը։
Նախարարությունը շեշտում է՝ նվիրաբերված ամբողջ գումարն օգտագործվել և բյուջետային գործընթացի շրջանակներում օգտագործվելու է պետական բյուջեով նախատեսված պետության, ռազմական դրություն հայտարարելու հանգամանքներով պայմանավորված ենթակառուցվածքների, սոցիալական և առողջապահական ծախսերի ֆինանսավորման նպատակով:
«Ընդ որում, նվիրաբերության գումարի հաշվին վկայակոչված ծախսերի ֆինանսավորումը հնարավորություն է ընձեռել ՀՀ կառավարությանը ՀՀ 2020 թվականի պետական բյուջեով այդ ծախսերի ֆինանսավորման համար նախատեսված միջոցները ՀՀ օրենսդրությամբ սահմանված կարգով ուղղել ռազմական դրությամբ պայմանավորված, նոր ի հայտ եկած ծախսերի ֆինանսավորմանը, որոնք 19.11.2020թ. դրությամբ կազմում են շուրջ 100,978,491.5 հազ. ՀՀ դրամ»,- նշված է հաղորդագրության մեջ։
Հստակեցվում է, որ ռազմական դրությամբ պայմանավորված` նոր ի հայտ եկած ծախսերի ֆինանսավորման նպատակով միջոցները հատկացվել են կառավարության համապատասխան որոշումներով։ Դրանց օգտագործման վերաբերյալ հաշվետվությունները կհրապարակվեն բյուջեների կատարման հաշվետվությունների շրջանակում՝ օրենսդրությամբ սահմանված կարգով:
Նախարարությունը նաև անդրադարձել է ԶԼՄ-ների այն հարցադրումներին, թե որքանով իրավաչափ է այս որոշումը։ Վկայակոչում են «Հիմնադրամների մասին» ՀՀ օրենքն ու հիմնադրամի կանոնադրությունը։
Օրինակ` կանոնադրության կետերից մեկի համաձայն՝ հիմնադրամի գործունեության նպատակներն ու խնդիրներն են օժանդակել Հայաստանի և այլ երկրների սոցիալ-տնտեսական զարգացմանը, բարեփոխումների իրականացմանը, նպաստել գիտական, կրթական, մշակութային, սոցիալական և առողջապահական համակարգերի բարելավմանն ու կատարելագործմանը և այլն։ Ի դեպ, ըստ նույն կանոնադրության՝ հոգաբարձուների խորհրդի իրավասությանն է վերապահված հիմնադրամի գույքի տնօրինման կարգի հաստատումը:
«Հայաստան» համահայկական հիմնադրամի միջոցների մի մասը նվիրաբերվել է կառավարությանը
«Տվյալ դեպքում, ինչպես վերը նշվել է, հիմնադրամի կողմից Հայաստանի Հանրապետությանը ֆինանսական միջոցները փոխանցվել են.
սահմանված կարգով կնքված նվիրաբերության պայմանագրերի հիման վրա,
պետության, ռազմական դրություն հայտարարելու հանգամանքներով պայմանավորված ենթակառուցվածքների, սոցիալական և առողջապահական ծախսերի ֆինանսավորման նպատակով օգտագործելու պայմանով,
հիմնադրամի հոգաբարձուների խորհրդի համաձայնությամբ»,- պարզաբանում է նախարարությունը։
Այս ամենը հիմք ընդունելով` նախարարությունն անհիմն է համարում «ոչ իրավաչափ լինելու վերաբերյալ գնահատականները»։
Ով որքան է նվիրաբերել Արցախին. «Հայաստան» հիմնադրամը հաշվետվություն կհրապարակի
