ԵՐԵՎԱՆ, 21 նոյեմբերի – Sputnik. Երևան է ժամանել Ռուսաստանի միջգերատեսչական պատվիրակությունը, որում նաև առողջապահության ոլորտի ներկայացուցիչներ են ընդգրկված։
Ռուսաստանի առողջապահության նախարար Միխայիլ Մուրաշկոն ՀՀ առողջապահության նախարար Արսեն Թորոսյանին է փոխանցել կորոնավիրուսի ռուսական պատվաստանյութի` «Սպուտնիկ V»-ի առաջին նմուշները։
«Այս բարդ ժամանակահատվածում դուք բախվել եք երկու խնդրի` բացի համաճարակաբանական իրավիճակից, նաև պատերազմի հետևանքով վնասվածքներ ստացած մեծ թվով հիվանդներ կան: Սա, իհարկե, մեծ մարտահրավեր է, և այն, ինչ երկրի բժիշկներն են անում, սխրանք ու հերոսություն է»,–ասել է Մուրաշկոն։
Նրա խոսքով` Ռուսաստանի բժիշկները պատրաստ են օգնել հակահամաճարակային միջոցառումների հարցերում։ Կարևոր են նաև վնասվածքաբանության և նյարդավիրաբուժության հարցերը։
![ՌԴ առողջապահության նախարարը Թորոսյանին փոխանցեց ռուսական պատվաստանյութի առաջին նմուշները ՌԴ առողջապահության նախարարը Թորոսյանին փոխանցեց ռուսական պատվաստանյութի առաջին նմուշները - Sputnik Արմենիա](https://cdn.am.sputniknews.ru/img/07e4/0b/15/25438576_0:0:1600:1040_600x0_80_0_0_605fe4596db4d860d7b7eb03ef5ba378.jpg)
Երևանում տեղի է ունեցել հայկական կողմին շարժական լաբորատորիա տրամադրելու արարողությունը: Այդ նպատակով Երևան է ժամանել Ռոսպոտրեբնադզորի ղեկավար Աննա Պոպովան։
Հիշեցնենք` Ռուսաստանն աշխարհում առաջինն է գրանցել COVID-19–ի դեմ պատվաստանյութը, որը ստեղծել են Գամալեայի կենտրոնը և Ուղիղ ներդրումների ռուսական հիմնադրամը։ Այն ստացել է «Սպուտնիկ V» անվանումը։ Առաջին խմբաքանակն արդեն իսկ շրջանառության մեջ է դրվել և Ռուսաստանի մարզեր է մատակարարվում։
1193 նոր դեպք, 31 մահ` մեկ օրում. կորոնավիրուսային հիվանդության ընթացքը Հայաստանում