ԵՐԵՎԱՆ, 21 նոյեմբերի – Sputnik. ՀՀ վարչապետ Նիկոլ Փաշինյանի և ՌԴ ԱԳՆ պատվիրակության հանդիպման ժամանակ ռուսական դրոշի բացակայությունը արարողակարգի խախտում չէ։ Sputnik Արմենիայի թղթակցին ասաց ՀՀ ԱԳՆ մամուլի խոսնակ Աննա Նաղդալյանը՝ մեկնաբանելով ԶԼՄ-ներում և սոցցանցերում տարածված հրապարակումները։
Ինչպես նշեց ՀՀ արտգործնախարարության մամուլի քարտուղարը, տվյալ դեպքում ամեն ինչ ճիշտ է եղել. հայկական դրոշի առկայությունն ընդգծում է Ռուսաստանի նախարարի և պետության ղեկավարի բանակցությունների կարգավիճակը։
«Մինչդեռ Հայաստանի և Ռուսաստանի արտգործնախարարներ Արա Այվազյանի և Սերգեյ Լավրովի հանդիպման ժամանակ երկու դրոշ է եղել, ինչը լիովին համապատասխանում է արարողակարգին»,– ավելացրեց Նաղդալյանը:
Ավելի վաղ հայկական որոշ ԶԼՄ–ներ ու ռուսական Telegram-ալիքներում սխալ էին մեկնաբանել ՌԴ ԱԳՆ պատվիրակության և ՀՀ վարչապետ Նիկոլ Փաշինյանի հանդիպման ժամանակ արարողակարգի կատարման հարցը։ Գրել էին, թե ռուսական դրոշի հետ կապված խառնաշփոթ է եղել, որն իբր միջազգային սկանդալ կարող էր առաջացնել։
Հիշեցնենք, որ այսօր ՌԴ կառավարական պատվիրակություն էր ժամանել Հայաստան։ Պատվիրակության կազմում են եղել ՌԴ կառավարության նախագահի տեղակալներ Ալեքսեյ Օվերչուկը և Ալեքսեյ Նովակը, առողջապահության նախարար Միխայիլ Մուրաշկոն, Դաշնային անվտանգության ծառայության 5-րդ ծառայության ղեկավար Սերգեյ Բեսեդան, Սպառողների իրավունքների պաշտպանության և մարդու բարեկեցության ոլորտում Դաշնային վերահսկողական ծառայության ղեկավար Աննա Պոպովան, ԱԳ նախարարի տեղակալ Անդրեյ Ռուդենկոն, ֆինանսների նախարարի տեղակալ Թիմուր Մաքսիմովը, պաշտոնատար այլ անձինք:
«Մենք այստեղ ենք Պուտինի որոշմամբ». Լավրովը Փաշինյանին է ներկայացրել իրենց մոտեցումները
Երեկ Ռուսաստանի նախագահ Վլադիմիր Պուտինը խորհրդակցություն էր անցկացրել՝ ուժային կառույցների, ֆինանսների, էներգետիկայի և արտաքին գործերի նախարարների մասնակցությամբ: Ռուսաստանի Դաշնության ղեկավարն ընդգծել էր Ղարաբաղի բնակիչներին համակողմանի օգնություն ցուցաբերելու կարևորությունը: Նա նաև հույս էր հայտնել, որ հայկական կողմի հետ այս հարցի շուրջ խորհրդակցություններն օգտակար կլինեն:
