ԵՐԵՎԱՆ, 21 նոյեմբերի – Sputnik. ՀՀ բարձր տեխնոլոգիական արդյունաբերության նախարար Հակոբ Արշակյանը ներկայացրել է, թե ինչ տեսք են ունենալու Հայաստանում արտադրված թոքերի արհեստական շնչառության սարքերը։ Նա ֆեյսբուքյան իր էջում լուսանկարներ է հրապարակել ու հայտնել` դեկտեմբերի երկրորդ կեսին սարքի վերջնական տարբերակը պատրաստ կլինի։
90 մլն դրամ է հատկացվել թոքերի արհեստական շնչառության սարքերի նախագծման մրցույթի համար
Արշակյանը հիշեցրել է, որ այս տարվա ապրիլին նախարարությունն Ինժեներական ասոցիացիայի հետ համատեղ հանդես եկավ թոքերի արհեստական շնչառության սարքերի մշակման նախաձեռնությամբ` Հայաստանում և աշխարհում կորոնավիրուսի տարածման կանխարգելման և բուժման միջոցառումների շրջանակներում։
«Հայաստանում մշակված թոքերի արհեստական շնչառության սարքի նախնական տարբերակը պատրաստ է, այն փորձարկումների վերջին փուլում է»,–գրել է Արշակյանը։
Նրա խոսքով` սարքերի վերջնական տեսքը որոշված է։
Նախագիծն իրագործվել է ամերիկյան NASA Jet Propulsion Laboratory լիցենզավորված պլատֆորմի հիման վրա, որը մրցույթի արդյունքում աշխարհի 330 ընկերություններից տրամադրվել էր ընդամենը 28-ին, որոնց թվում էր նաև հայկական YEA Engineering ընկերությունը։
Հիշեցնենք, որ թոքերի արհեստական շնչառության սարքերի նախագծման համար Բարձր տեխնոլոգիական արդյունաբերության նախարարության նախաձեռնությամբ և կառավարության որոշմամբ 90 մլն դրամ է տրամադրվել Ինժեներական ասոցիացիային։
Վրաստանաբնակ հայերը Հայաստանին արհեստական շնչառության սարքեր են նվիրաբերել
Հավելենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 1193–ով և դարձել 124839։
Կառավարության որոշմամբ հանրապետությունում մինչև 2021թ.–ի հունվարի 11–ը կգործի կարանտինի ռեժիմ։ Կարանտինի ընթացքում որոշ սահմանափակումներ մեղմացվել են, բայց հասարակական վայրերում դիմակ դնելու պահանջը շարունակում է գործել:
