ԵՐԵՎԱՆ, 16 նոյեմբերի – Sputnik. ՀՀ վարչապետ Նիկոլ Փաշինյանը կարծում է, որ ՀՀ կառավարությունը պետք է մասնակցի Արցախի հարցով բանակցություններին։ Նա այդ մասին ասաց այսօր կազմակերպված ասուլիսի ժամանակ` պատասխանելով հարցին, թե ի՞նչ է կարծում` արդյոք հանրային վստահությունը բավարար է, որ մասնակցի բանակցություններին։
«Գործնականում այժմ տեղի է ունենում բանակցային նոր օրակարգի ձևավորման գործընթաց։ Եթե պարզվի, որ հանրային վստահությունը բավարար չէ, չենք կարող մասնակցել այդ բանակցություններին»,–ասաց Փաշինյանը։
Սակայն, ըստ նրա, եթե ինքը շարունակի մասնակցել բանակցային գործընթացին, ուրեմն հանրային բավարար վստահություն ունի։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Հայաստանի, Ադրբեջանի և Ռուսաստանի առաջնորդների եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորակազմ ՝ 1960-ական զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
