ԵՐԵՎԱՆ, 13 նոյեմբերի - Sputnik. Արցախի Հանրապետության տարածքում առաջնահերթության կարգով լուծվելու են բնակարանային ապահովման խնդիրները։ Այսօր Երևանում կայացած մամուլի ասուլիսում հայտարարեց ՀՀ-ում Արցախի կառավարության օպերատիվ շտաբի համակարգող, ԱՀ աշխատանքի, սոցիալական և բնակարանային հարցերի նախարար Միքայել Վիրաբյանը։
Այս պահին, նախարարի խոսքով, Արցախում անհետաձգելի կարգով իրականացվում են ականազերծման ու չպայթած հրթիռների վնասազերծման աշխատանքները`ապահովելու հայկական ուժերի վերահսկողության տակ մնացած տարածքների բնակիչների անվտանգ վերադարձը։ Արագորեն վերականգնվում են նաև քաղաքացիական ենթակառուցվածքները։
«Համոզված եմ, որ մի քանի շաբաթվա ընթացքում, երևի 15-20 օրվա ընթացքում կոնկրետ Արցախի մայրաքաղաքում ու հարակից տարածքներում այդ խնդիրները լուծված կլինեն»,– ասաց Վիրաբյանը։
Ինչ տեսք ունի Քարվաճառն Ադրբեջանին հանձնելուց 3 օր առաջ. լուսանկարներ
Ինչ վերաբերում է Ադրբեջանին անցած տարածքների բնակիչների բնակարանային խնդիրների լուծմանը, Միքայել Վիրաբյանը նշեց, որ այս պահին կատարվում են հաշվառման աշխատանքներ։ «Անձնական անհատական դիմումներով կփորձենք հասկանալ` ՀՀ–ում բնակարանային ապահովման անհրաժեշտություն կլինի, թե չէ», – ասաց Վիրաբյանը։
Իսկ մինչ այդ փորձ է արվում լուծել Հայաստանում մնացած արցախցիների սոցիալական խնդիրները։ Վիրաբյանի խոսքով` հյուրանոցներում կոմունալ ծախսերն ու սննդի հարցը հոգում են սեփականատերերն ու մասնավոր ընկերությունները։ Իսկ բարեկամների տանն ապաստանած արցախցիների վերաբերյալ ՀՀ կառավարությունը, Վիրաբյանի տեղեկություններով, առաջիկա օրերին որոշում կկայացնի։
Հընթացս փորձ է արվում լուծել նաև Հայաստանում գտնվող արցախցիներինաշխատանքով ապահովելու հարցը։ Վիրաբյանի տեղեկություններով, ՀԿ–ների հետ համագործակցության շնորհիվ 58 արցախցի կին այս ընթացքում ապահովվել է ժամանակավոր զբաղվածությամբ։
«Արցախի մշակութային արժեքները ներկայացնելու միջոցով նրանք կարողացել են ապահովվել որոշակի օրական աշխատավարձով։ Դրանք մեր ավանդական ժենգյալով հացի թխման, կորկոտի պատրաստման, թթվի` աղ դրածի պատրաստման աշխատանքներն են։ Այդ ամենը ՀՀ մեր հայրենակիցները, մեր քույր–եղբայրները մեծ ոգևորությամբ գնում են, ու արդյունքում արցախցի կանայք վարձատրվում են»,– ասաց նա։
Արցախցի ևս 300 կանանց օրերս աշխատանք են առաջարկել Հայաստանի կարի ֆաբրիկաների սեփականատերերը։
Նշենք, որ Արցախի կառավարության օպերատիվ շտաբը Երևանում գործում է Գարեգին Նժդեհի 23/1 հասցեում։ Այն զբաղվում է արցախցիների սոցիալական ու վարչական սպասարկման (սոցիալական վճարների ստացում, փաստաթղթերի գրանցում, վերականգնում և այլ ծառայություններ) ու աջակցության այլ ծրագրերի իրականացմամբ։
Հավելենք, որ Արտակ Բեգլարյանի հայտարարել էր, որ պատերազմի ժամանակ ներքին կամ արտաքին տեղահանության է ենթարկվել մոտ 100 հազար արցախցի։
