Քարվաճառի բնակիչները փորձում են իրենց ունեցվածքը տեղափոխել։ Sputnik Արմենիայի թղթակիցը ֆիքսել է` ինչպես են տեղի բնակիչները տեղափոխում իրենց իրերը։
Քարվաճառն Ադրբեջանին է հանձնվելու երկու օր անց` նոյեմբերի 15-ին։
Մինչ այդ Քարվաճառի ճանապարհները ծանրաբեռնված են մեքենաներով` այսօր ողջ օրն այնտեղ շարժ է եղել։ Ամենակարևորը, սակայն, տեղափոխել հնարավոր չէ...
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար չափազանց ծանր որոշում է կայացրել:
Փաշինյանի հայտարարությունից հետո բազմաթիվ մարդիկ շարժվել են դեպի Հանրապետության հրապարակ, մի խումբը ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։
Նշենք, որ Թուրքիայի աջակցությամբ Ադրբեջանի սանձազերծած պատերազմի ընթացքում, ըստ վերջին տվյալների, հայկական կողմից զոհվել են 1302 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
